Hrant Dînk 15ê Îlon 1954î de, Meletî de ame dinya. Keyeyê Dînk serra 1961î de, koçê metropola Tirkiye Estenbolî kerd. Hrant’î di birayanê xo ra piya, mektebê siftayin Încîrdî û bado zî Becziyan de wend, Lîseyê Surp Haç Tibrevank ê Uskudar de qedîna. Wendena berz jî, Zangehê Stenbolî de, Fakulteya Fen de, beşê Zoolojî wend.
Hrant’î tehdît kerdî
Serra 1996’î de bi rayverînê Patrîkxaneyê ê çaxî, rojnameyê AGOS vet. Eynî ser de, bi nûşteyanê xoya medya teverî miyan de jî eleqe ant xo ser. Dînk’î bi nûste û xeberanê xoyê derheqê tarîxa Ermeniya jî eleqe ant xo ser. Ê xeberan ra jû zî, derheqê keyna manewî ê Ataturk’î Sabîha Gokçen de bî. Hrant Dînk’î bi jû xebera xo vat ke, keyneya manewî yê Ataturk’î Sabîha Gokçen, seykurxane ra girotiyaya û jû keynaya Ermeniya.Na xeber ser, Serfermandarînê Artêşa Tirk Hrant Dînk kerd hedef. Badê na mesele waliyê ê çaxî ê Estenbolî Muamer Guler’î veng da Hrant Dînk’î û ey tehdît kerd.
Edalet nêamê ca
Mehkemanê Tirk zhi bi sûcê ‘Tirkî werdî visto’, derheqê Hrant’î de xeylê dawayî akerdî. Badê tehdîtanê ciya ciyayî, 19ê Çile yê 2007’î de, edîtorê pêroyin ê Agosî Hrant Dînk bi 3 guleyan kişiya. Çiqe ke, ser kiştenê Hrant Dînk’î 9 serrî ravêrdî zî, hewna wastenê edaletî nêardiyayo ca.
Ogun Samas zey kiştox mehkeme bi û 22 serrî û 10 mengî ceza werd. La belê quwetê ey pey de, nêvejyay werte. Kiştoxî esasiyê hewna hetê dewleta Tirk pawiyenê. Badê lejê îktîdarî yê mabenê AKP û cematê Fetullah Gulenî de, dest kerd ci, kiştenê Hrant Dînk’î newe ra ame rojew. La belê dewleta Tirk na qorî zî mesûlinî erzena cematê Gulen’î ser, xo pîr û pak mûsnena û mesûlînê hukumetê AKP nimnena. Hrant Dînk serragêra qetilkerdiş de, hetê heskerdenanê xo Stenbol, Enqera, Îzmîr de ame vîrardiş.
NAVENDÊ XEBERAN