FERHAT ÇELÎK / MA /STENBOL
13 serrê verî Hrant Dînk bi hovane ame qetilkerdiş, tewro zaf deja ci Rojnameya Agosî de yeno cuyayiş. Demê awanbîyayişê Rojnameya Agosî de Rejîsorê Weşanî yê Rojnameya Agosî Yervart Danzîkyan, Hrant Dînk reyde xebat kerdo. Seba rojnameya Agosî ya muhîmîya Hrant Dînk ser o qise kerd.
Rejîsorê Weşanî yê Rojnameya Agosî Yervart Danzîkyan vat ke Hrant Dînk Meletî de ameyo dinya, Stenbol de zî zor û zehmetî de cuya kerdo û wina vat: “Hrant seba ke ermenî bîyo, demê 12 Êlule Qişlaya Selîmîyeyî de mendo la qet seba averberdişê kultir û tarîxê şarê ermenî ra fek vera nêdayo. Hrant waştî ke çi qirkerdişanê ermenîyan ser o ameyo heme dinya ra bido famdayiş. Hrant Dînk rojnamegêko demokrat, çepgir bî.”
Seba Agos muhîmîya Hrantî
Rejîsorê Weşanî yê Rojnameya Agosî Danzîkyan aşkera kerd ke serra 1996î de Hrant bi karsaz, roşnvîr û rojnamegeran persgirekê şarê ermenî û newe ra cuyadayişê kultir û tarîxê ermenîyan ser o xebat kerdo û rojnameya Agosî zî bi no armancê ameyo awankerdiş.
Danzîkyan aşkera kerd Rojnameya Agosî de zafin ziwanê tirkî yeno şuxilnayiş û wina domna: “Ma eşkîyaynî rojname bi temamî ermenkî weşan bikê la armancê ma hem tirkan hem zî ermenîyan ra resayîş bî. Ma qetilbîyayişê Hrantî ra pey qet armancê xo yê raştin ra fek vera nêda. Ganîyo ke cînayetê Hrantî bêro roşnkerdiş. Hrantî pey zî taybetî weşanê ma roşnkerdişê cînayetî Hrantî ser o şono.”