HRW di rapora xwe de diyar kir ku komên çekdar li bajarê Sadad’ê tevî jin û zarokan 46 sivîl qetil kirine. Rapora lêpirsîna ji aliyê HRW ve hat meşandin, di 19’ê Mijdarê de hat weşandin. Li gorî raporê, mûxalefeta Suriyê li bakur rojhilatê Şamê li bajarokê Xiristiyanan Sadadê di navbrea 21-28’ê Cotmehê de 14 jê jin û 2 jê zarok 46 sivîl qetil kiriye. Li gorî rapora HRW di dema êrîşên li hemberî artêşa ser bi Beşar El Esad de “şervanên serhildêr” nehiştin sivîl malên xwe yên li qadên şer biterikînin. Saziya Çavdêriya Mafên Mirovan a Sûriyê, ku navenda wê li Londonê ye û bi nêzbûna xwe ya li jî mûxalefeta Sûriyê tê zanîn beriya niha komkujiya komên çekdar a li bajarokê ji 3 hezar şêniyî qebûl kiribû. Saziya Çavdêriyê gotibû, “Bûyerên qetilkirinê di 21’ê Cotmeha 2013’an de bi êrîşa Eniya El Nûsra ya li dijî bajarok destpê kir û di 28’ê Cotmeha 2013’an de bi vekişîna El Nûsra û hevalbendên wê re bi dawî bûne.”

Berpirsyara Maseya Rojhilata Navîn a HRW Sarah Leah Whîtson jî got, “Şervanên mûxalefetê dema ketin hundirê Sadadê gotin ewê zerarê nedin sivîlan, lê belê tişta ku kirin berevajî vê bû.”
Li aliyê din lêkolînera ji Sûriye û Lîbyayê berpirsyar a NRW Lama Fakîh ji Radyoya Dengê Rûsyayê re axivî û diyar kir ku şervanan sivîl weke mertalên zindî bikaranîne û got, “Li derdora vî bajarî 6 kes û 4 kesên bi awayekî derveyî qanûnî û bêyî îradeya wan ew tevli şer kirin, jiyana xwe ji dest dan.” Fakîh got, “Di rapora meha Cotmehê de me ragihandibûn ku di dema pevçûnên li herêma Lazkiye de zêdeyî 190 sivîl ji aliyê komên mûxalîf ve hatine qetilkirin.”
Di rapora 11’ê Cotmehê hat weşandin de NRW dabû xuyakirin ku Artêşa Azad a Sûriyê û komên ser bi El Qaîdeyê di 4’ê Tebaxê de 57 jê jin û 18 jê zarok herî kêm 190 sivîl qetil kirin. HRW destnîşan dike ku di ser Tİrkiyê re şervan û çek derbas kirine û bang li Konseya Ewlekariyê ya Neteweyên Yekbûyî hatibû kirin ku bang li Tirkiyê bike. Heman komên mûxalîf di destpêka meha Tebaxê de êrîşî Kurdên sivîl ên li bajarokên Til Hasil û Til Eran ên navçeya Heleb Sefîreyê kiribûn û nêzî 50 kes qetil kiribûn û 350 kes jî dîl girtibûn. Li dû van êrîşan çeteyên El Qaîdeyê yên Dewleta Îslamî ya Iraq û Şamê û Eniya El Nûsra êrîşî herêmên Kurdan kiribûn, gundên Kurdan talan kiribûn û gelek sivîl dîl girtibûn.

WASHÎNGTON