Dewleta tirk ke kewte tenge, Çatli û Yeşîlanê xo kena dewre. Serranê 80 û 90 de dewleta gonewere verva kurdan taye qetilkarî kerdî dewre. Nîna ra en jede Çatli û Yeşîl vejayî ver. Dewlete ebi nînan karê xo yo qilêrîn dênê kerdene. Bi deste nînan ebi hezaran welatêparêzê kurdî ameyî qetil kerdene. Çîller û Dogan Gureş hetê ra bi arteşa xo dewê kurdan vêsnenê, hetê ra bi destê nî qetilkaran înasnê kurdî qirkerdenê.
Nika kî dewleta AKP aynî metod ana kar. Verecoy serokkomaro tirk Recep Tayyîp Erdogan, sermiyananê dewleta tirkî nî hefteyanê peyenan de kurdî tehdît kerdî. Ravêr, mavênê  6 û 8 asma cotmehe de hukumatê AKP nî tehdîtê sermiyananê xo ardî ca. Dewleta terorîste û ciyakare 2 rojî miyan de 40 ra jede însanê kurdî bi destê polîs, esker û paralêlanê xo dayî qetil kerdene.
9 asma cotmehe Çewlîg de 2 polîsî ameyî kistene. 1 saete û 15 deqeyî na biyayîs ra dima quwetanê dewleta terorîste hetê Dara Henî de 4 kurdî qetil kerdî. Serokkomar û serokwezîrê tirkî wiştî ra vat “qetilkarê polîsanê ma amê kistene, ceza xo diya.”  Seweta sermiyananê dewleta qetilkare honde mûhîm nêbî, nî mordemêke amê kistene kamî yê. Seweta Recep Tayyîp Erdogan û serokwezîrê xo însanêke ameyî bî qetil kerdene gerîlla û welatparêzê kurd bî, no mûhîm bî. Dima raporanê balîstîk de bî zelal ke tekîliya nî kurdan kistena polîsanê AKP de çîna. La sermiyanê dewleta ciyakar û faşîste hona kî na derheq de bêvengî yê. Rîwalê biyayîsê Çewlîg ra kurdî cerînê binê çim erjînê hepis, rixmê raporanê balîstîk.
Anqara de 4ê na asme karkerê partiya HDP Ahmet Karataş bî hedefê serestîsê Çatli-Yeşîlê AKP, Emrah Akman. Ahmet Karataş, hetê Çatli-Yeşîlê AKP Emrah Akman ra giran ame dirvetin kerdene. Çatli-Yeşîlê AKP, Emrah Akman wastenê sarê Ahmet Karataş bibirno. No metod kî ma rê xam niyo. Çeta DAÎŞ metodê sare biraneye ana kar. Ma zoneme ke hukumatê AKP na garana qetilkaran rê her het ra yardim keno. No bîyayîs kî tehdîtanê sermiyananê faşîst yê AKP ra dima ame meydan. AKP bi na biyayîs mesaj da kurdan û vat: “Çatli û Yeşîl sima bi gulleyan kistenê, Çatli-Yeşîlê ma yê neweyî sarê sima birnenê.”
Hukumatê AKP endî siyasetvananê kurdî hewa ra bîle taqîb keno. Îta de kî onca jê demê verî rêxistina Hîzbulkontra ano kar. Jû azayê rêxistina Hîzbulkontra wirzeno ra zerrê teyara de qese saneno hemserokê partiya HDP, birêz Selahattîn Demîrtaş û sono ser. Çi tesaduf! Parlamenterê AKP Mehmet Hamzaogullari kî uca ro û na biyayîs keno vila.
Hora şîndorê Bakur û Rojavayê Kurdîstan sero JÎTEMÊ dewleta gonewere vejiyo saydê însanê kurdî. En peyecoy canika kurde Kader Ortakaya hetê JÎTEMÊ Recep Tayyîp Erdogan ra amê qetil kerdene. Mordemîke nî biyayîsî ardî têhet, vîneno ke tehdîte sermiyananê dewleta terorîste teyna vatîs de nêmanenê. Erdoxan û Davutoglu verva kurdan Çatli-Yeşîl, JÎTEM û Hîzbulkontara ya xo kenê dewre.