Kovara Vateyî ke serra 1997î ra nata bi hawayo nizamin hîrê aşman de reyêk vejîyena, nika zî hûmara newa ya 56. vejîyaye. Kovara Vateyî ke averşîyayîş û standardbîyayîşê kirmanckî de wayîrê rolêko muhîm a, heta nika bi hûmaranê erjîyayeyan weşanê xo domnaye. Kovara Vateyî yewna rey bi muhtewayêka debîyaye yena wendoxan ver. Sey her hûmare muhtewaya na hûmare zî bi roportaj, nuşte, şîîre û sewbîna pirr a.
Nuşteyê redaksîyonî yê Kovare de ca dîyayo muhtewaya na hûmare. Goreyê nuşteyê redaksîyonî, na hûmare de nuşteyê bi nameyê ‘Manastirê Arêg û Azaxpêrtî’ yê Aydin Baturî weşanîyayo. No nuşte de ca dîyayo melumatanê xaman û hetê tarîxî ra xeylê melumatê muhîmî ca gênî.
Reyna na hûmare de daşinasnayîşê kitabê ‘Estanikê Bongilanî’ yê Ayşe Kaya, hetê Selma Doguye ra ameyo kerdene. No nuşte de hem nuşte û hem zî nuştox dîyayo naskerdene. Na hûmare de 2 roportajî estî; roportajan ra yew hetê Mutlu Canî ra şaîrê kirmancanê Tekmanî ra Dewrêş Îsmaîlî reyde têkilîya elewîtî û îslamîyetî ser o ameyo viraştene. Roportajo bîn zî hetê Alî Aydin Çîçekî ra hunermend Egît Doganî reyde cuye û hunerê ci ser o ameyo viraştene.
Nuştoxê cinîyî hîna zêde bîyî
Nuştox Îhsan Esparî kitabanê Hesenê Metêyî ra yê ‘Li Dêrê’ bi nameyê ‘Dêrê Santa Ragnhild de’ açarnayo kirmanckî. Na hûmare de ca dîyayo beşêkê hîkayeya destpêke ya kitabî. Hetê na hîkaye de na hûmare de ca dîyayo hîkayeyê M. Mamet Qetekonij, Sedef Kandemîr û Vesîle Doguçe. Goreyê hûmaranê bînan, na hûmare de hîna zaf ca dîyayo nuşteyanê cinîyan.
Na hûmare de ca dîyayo xeylê şîîran zî. Şîîrê na hûmare hetê Harûn Bozkurt, Akman Gedîk û Şeyda Asmîne ra nusîyayî. 3 nuşteyê Nurî Keleşî bi nameyê ‘Çend Fablê Kirmanckî (Zazakî)’ na humare de ameyî dayîş. Sewbîna na hûmare de nuşteyêk Mehmud Nêşiteyî, yew sanika ke Tekîn Agacikî newe ra nuşta û di fiqrayê B. Şîlanî estî. n MERKEZÊ XEBERAN