Hunermendê kurdî Mizgin Tahîr, Şiva Perwer, Xelîl Xemgîn, Dîyar Dersim, Hesen Şerîf, Amal Saîd û Necmettîn Xulamî tewrê bernameyê ''Nirxandin'' ê Stêrk TVyî bîyî. Hunermendan derheqê ambargoyê Kampa Mexmûrî, têmîyankewteyê Zînî Wertê de qisey kerd. Xelîl Xemginî vat seba ke yewîya kurdan çin a, kolonyalîstî hêrişê kurdan kenê. Seba caardişê yewîya neteweyîye hunermendan 6 mengî verê cû platformêk awan kerd. Xemginî hêzanê kurdan ra waşt ke meseleyan pê rayîrê dîyalogan çareser bikerê. Mizgîn Tahîrî zî ard ziwan ke dişmenê destkewteyanê kurdan ra aciz ê. Hunermend Necmettîn Xulamîyî va: ''Kêmasîya tewr pîle ya kurdan yewîya neteweyî ya. Heta nika herêma Kurdîstanî qetilkerdişê 3 cinîyanê Mexmûrî şermezar nêkerd. Şarê Mexmûrî nêeşkeno şoro Hewlêr de tedawî bivîno. No nêno famkerdiş.'' Hunermend Hesen Şerîfî va: ''Kurdî eşkenê pêro meselayan pê dîyalogî çareser bikerê. Ez venga hêzanê kurdan dana ke dîyalogan bidê destpêkerdene.'' Amal Saîdî va: ''Meseleya Zînî Wertê şarê Başûrî kena xemgin. Dejê ma yew o, çira ma yew nêbenê?'' Dîyar Dersimî zî va: ''Şermêko pîl o ke hêzêkê kurdan hetê dişmenan ra yeno xebitnayene. Kurdistan de domanî zî zanenê ke mabênê Saddam û Erdoganî de ferqêk çin o.'' BRUKSEL