Alozîya Zînî Wertê ya ke pê Zînî Wertê de cakerdişê hêzanê PDKyî û şehîdbîyayîşê 3 gerîlayan dest pêkerd şarê kurdî qerqiznena. Platformê Hunermendanê Kurdistanî yo ke serra 2000î de hetê hunermendan ra seba ke paştî bido yewîya neteweyîye ronîya pê derheqê babete de eşkerayîyêke daye. Hunermendan eşkerayîya xo de vist vîrî ke Dewleta Tirkan seba ke destkewteyanê kurdan çin bikerê her hetî ra hêrişê kurdan kena û na babete zaf girîng vînena. Hunermendan îfade kerd ke semedo ke yewîya kurdan nêameyê caardene Efrîn, Girê Sipî, Serêkanîyê û herêmê Başûrê Kurdîstanî ameyî îşxalkerdene. Aşkeraye de ame vatene: ''Dewletê Tirkan û Îran alozîya mabênê kurdan seba menfaatanê xo asta stratejîke de girîng vînenê. Alozîya ke Kurdistanê Başûrî de qewimîyena şarê ma qerqiznena. Ma zî sey hunermendanê kurdan zaf qerqizîyenê ke gelo reyna birakûjî-kiştişê birayan do bêro meydan yan ney. Ma ke seba caardişê yewîya neteweyîye 6 mengî verê ameyî pêser reyna anê ziwan ke hewceyê ma pê yewîya neteweyîye esto.'' Hunermendan hêrişê dewleta tirke yê vera Mexmûrî zî şermezar kerd. Platformê hunermendan seba çareserîya alozîya Zînî Wertê vengê PDK, YNK, PKK, Hukmatê Herêma Kurdistanî, selahîyetdaran û dezgehan da ke esasê menfaatanê yewîya neteweyîye ser o têbigêrê û mesele pê dîyalogan çareser bikerê. BRUKSEL