Mural; xêzkerdişê dêsan, serke yan zî wareyo pîlî ser o pê boyaxkerdişî viraştişê hunerî yo yanî ressamîya dêsî ya. Çarçewaya Festîvala Muralî ya Dêrsimî ya 1. de Dêrsim de zafê dêsî pê hunerê mûralî ameyî rengkerdene.
Yûsûf Înan Guneşî Parka Mamekîye de xebatê xo kerdî û erjê kulturî yê Dêrsimî xêzanê xo de nawitî. Guneşî dîyar kerd ke ganî merdimî welatê xo reyde bi rayîrê hunerê ey nas bibê û no zaf muhîm o ke merdimê ke teberî ra yenê rewşa estetîkê bajarî bivînê.
Guneşo ke erjanê herême ser o xebetan keno, va ‘ez verê Muzirî de xebatanê xo kena, no seba mi zaf muhîm o’ û wina dewam kerd: “Mi waşt ke erjanê Herêma Dêrsimî ser o tayê xebatan bikerî. Dadîyê ma erjê tîya yê yewin ê, êyê diyîn zî tebîet û pezkovîyê temsîlkarê tebîetî yê ke nê tewr nêvurîyenê. Ez xebitîyayîşê fîguranê aîdê şarî ra hîna zaf hes kena. Ez zaf bextewar a ke mi dêso verê bajarî ser o hunerê xo viraşt.”
Eke tebîet vinî bibo, kultur zî vinî beno
Seke yeno zanayene Koyê Muzirî sey wareyê madenî ameyî îlankerdene. Guneşî qala na babete zî kerde û da zanayene ke dimayê Koyanê Kazî, Koyê Muzirî zî sey wareyê madenî ameyî îlankerdene û wina dewam kerd: “Nimuneyê tebîetê Dêrsimî çin o. Sey yew hunermendî ez wina fikirîyena ke wareyê madenî qerarêko xelet o. No tebîet beno ke yew mîlyon serrî de ameyo meydan. Seba panc serran bi hewayêkê winasî do bêro çinkerdene. Eke tebîetê Muzirî vînî bibo, kulturê ci zî vînî beno.”
PÎRHA / DÊRSIM