Sey ke yeno zanayîş bi Qerarnameyê Hukmê Qanûnî xeylê akademîsyen, hemşaredar, parlementer û kedkarî gureyê xo ra ameybî eştiş û zafaneyê înan zî ameybî tewqîfkerdiş. Hemşaredara Ozalpî Handan Bagciye 9ê teşrîna verêne ra nata, Hemşaredara Şaredarîya Çaldiranî Suna Atabaye 3ê teşrîna peyêne ra nata, Hemşaredara Şaredarîya Sarayî zî 30ê êlule ra nata bi îdîaya ‘endamê rêxistine’ tewfîqkerde yî. Îdîanameyê hemşaredaran nîno amadekerdiş Babete ser o Avûkat Denîz Yildize qisey kerde.
Qerarî sîyasî yî
Yildize qiseykerdişê xo de bale ante amade nêbîyayîşê îdîanameyê hemşaredaran ser û qiseykerdişê xo wina domnaye: “Derbe ra dima huqûq qedîya. Sucdarbîyayîşê hemşaredaran yena manaya meşrûkerdişê qayûman. Seba amadekerdişê îdîanameyan paweyê referadûmî yî. Çimkî goreyê netîceyê referandûmî do îdîaname amade bikerî. Heme qerarî sîyasî yî û eleqeyê xo edalet reyde çin î.”
Beno ke ceza bidîyo
Yildize dewamê qiseykerdişê xo de va ‘şert û mercanê normal de mumkun nîyo ke hende hemşaredar bêrî tewfîqkerdiş’ û qiseykerdişê xo wina qedênaye: “Ganî îdîanameyê kesê ke ameyî tepiştiş, mîyanê 1 yan zî 2 aşmî de bêrî amadekerdiş. Seba tepişteyê sîyasî huqûq çin o. Îtîrazê ke ma seba amade nêbîyayîşê îdîanameyan kerdî, bênetîce mendî. Beno ke AÎHM seba dergkerdişê dozan ceza bido Tirkîya.”
ANF / WAN