Îlhan Çomak ke serra 1994î ra na het zindan de yo reyna (fina) tehliye nêbi. Roniştişê dawa roja Hîrêşem de Mahkemeya Ceza yê Giran yê Stenbol de amê vîniten. Parlamenteranê HDP, CHP, malbata Çomak û hunermendan ra piya xêlê kesan dawa dawa taqîp kerd. Îlhan Çomak’î roniştişê dawa de qisey kerd û persa ‘semedê hendayê cezayê giran mi sekerd?’ kerd û behsa serpêameyişê xo kerdî.
Hinî wazena teber de şiîrî binusa
Çomak’î vist vîrî ke wexto ke o ameyo tepiştiş 21 serrî bi, la nika 43 serrî yo û va, ‘ez endî wazena şiîranê xo teber de binusa.’ Çomak’î îdiayanê sûcî red kerd û tehliyeyê xo waşt. Peycoy îfadeyê polîsan waniyayî. Çomak’î aşkere kerd ke îfadeyî zûrî yê û bi îşkence ameyê giroten. Pawitoxanê Çomak’î zî heyetê mahkeme rê îtiraz kerdî û serbestiya muwekîlanê xo waştî. Heyetê mahkeme delîlê ke dosya de yê zey sedem damusna û qerarê dewamiya tehiştişê Çomak’î da û dawa taloqê 1’ê Hezîran kerd.
Verpersê DAIŞ serbest veradiya
Badê roniştiş malbata Çomak ver edliye de damustayin day çapemenî. Bira Nazim Çomak’î bi vatişanê ‘Seraya Edaletî de edalet çinyo’ nêrazîbiyenê xo aşkere kerd. Çomak’î vist vîrî ke verpersiyarê DAIŞ ke girotxaneyan de bi zî serbest ame viradayen û va, serva serbest veradayişê birayê xo çi destê ci bîro do bikero. Nazim Çomak’î aşkere kerd ke îye ke Îlhan’î serbest nêverdanê sûcê merdimatî kenê û va, 1ê Hezîran de serva girotişê Îlhan’î ma dê bîrê na ca û heta ke ma Îlhan’î nêgîrê ma ê ver kêberê edliye ra nêşirê.
Hunermend Ferhat Tûnç’î zî qisey kerd û va, no sîstemê edalet, edalet vila nêkeno. Badê damustayinan sloganê zey ‘Îlhan Çomak tenya niyo’, ‘Ti şiîrê xo binuse ma pey to de yê’ berz bî. Îlhan Çomak ke serra 1994î de Wendekarê Zangehê Stenbol yê Fakulteyê Fen yê Cografya be, bi îdiayê ‘gureyînê rêxistin ramiten’ tepişiya. Çomak wextê cipersyayiş de 16 rojî raştê îşkenceyanê giran ame. Rixmo ke cezayê Çomak’î xirab bi, la 22 serriyo bi tepişte yeno mahkeme kerdiş.
DÎHA/STENBOL