Rayverê Şarê Kurd Abdullah Ocalanî ra 146 rojîyo hayderî nîno girewten. CPT mavêna 28-29'ê Nîsane şîbî zîyaretê, la seba ke rapora ke hadre kerdo aşkere bikero tesdîqkerdişê Tirkîye pawenê. Ser nameyê pawitoxanê Ocalanî pawitox Îbrahîm Bîlmezî waşt ke desinde rapor bîro aşkere kerdiş. 

Tecrîdê girankerdî yê hemverê Rayverê Şarê Kurd Abdullah Ocalanî rameno. Ocalan 18 serrîyo Girawa Îmrali de bin îzolasyonekê zaf giran de yeno tepiştiş. Îmrali de dûştê Ocalanî sîstemekê taybet yeno ferzkerdiş. Rayverê Şarê Kurd verîya coy Îmrali zey tabûteke hesibnabi. Serragêra 18. yê Komployê Mavênneteweyî de pêrokîn çimê açaryay ser Îmrali. Pawitoxê Ocalanî 6 serrîyo nêşkenê şirê muwekîlê xo het û pêra pêdiyayişî virazê. Herzewbîn no 146 rojanê peynî de zî Ocalanî ra xeber nîna girewtiş. Dewlet û sazgehê mîyanneteweyî na babed de xo kenê kerr, korr û lal. Tewr peynî de Konseya Ewropa  28-29'ê Nîsane de Komîteyê Vernîgirewtişê Îşkence û Muameleyê Xirab (CPT) ruşnabe (şawitene)  Girawa Îmrali. A demî ra na het girotxaneyanê Tirkîye de her ke şino îxlalkerdişê heqan benê vêşî. 

Rexneyê ke weşê Tirkîye nêşinê estê

Heto bîn ra, rexmo ke ser ra çend aşmî ravêrdî zî CPT heta nika derheqê zîyareta xo ya  28-29'ê Nîsane ya Îmrali de îzahateke nêda.

Pawitoxê Ocalanî Îbrahîm Bîlmezî hefteya verîn Strasbûrg de derheqê rewşa Ocalanî de, bi sermîyananê CPT ra pêdiyayiş viraşt. Çi heyf ke na pêdiyayiş ra zî netîceyekê nêvejya. Sermîyananê CPT vato ke rapora Îmrali hadre ya, la seba aşkerekerdişê raporî ê tesdîqkerdişê Tirkîye pawenê. Bîlmezî vist vîrî ke winî ayseno ke rapor de tayî rexneyê ke weşê Tirkîye nêşinê estê û wina dewam kerd: “Heto bîn ra no wezîyet zî damûsneno ke mavêna Tirkîye û CPT de tayî bazarey estê. 

Herkes meraq keno 

Îbrahîm Bîlmezî hayr ant zîyaretanê CPT yê verînan ser û vist vîrî ke demê ravêrdî de zî CPT şî Îmrali û raporê ke amey hadrekerdiş tayînan wextekê kilm ra dima, tayînan zî wextekê dergî ra dima aşkere kerd. Bîlmezî dîyar kerd ke badê wextekê kilm zîyaretê CPT yew serrîya xo temam keno û nê detayan da: “Zey pawitoxê Birêz Ocalan ma û pêrokîn şarê kurd wezîyetê ci meraq kenê. Ma wazenê ke rapora ke ameya hadrekerdiş bîro aşkerekerdiş. Ma hefteya ravêrdî de na waşten sermîyananê muxatab ra zî va. Zîyareta Nîsana 2016’î ra 10 aşmî ravêrdî û şert û mercê nikayî yê a demî ra xirabîn bîye. Ma nêşkenê vajê ke Îmrali de rewşeka rind/hol esta.”  Pawitoxê Ocalanî Bîlmezî da zonayen ke xeylê ray û metodê CPT estê û pêşnîyazanê xo rêze kerd: “Mesela CPT êşkena şiro Îmrali. Vernîya ci de qet manîbîyayîşî çîn o. Xeylê girotxaneyanê Tirkîye de îdiayê  îşkence û muameleyê xirab estê. Êşkena bîro û reyna cigêrayîş bikero. Ya zî CPT êşkeno Meclîsa Parlementeranê Konseya Ewropa û DMME rê rapor binuso. La CPT nayî zî nêkeno. Tam  zî ma proseso ke ganî CPT rolê xo kay bikero de yê. Him hetê Îmarli de him zî hetê pêroyîya Tirkîye de. La çi heyf ke CPT rolê xo kay nêkeno.” 

Raştê îzolasyonê komî yenê

Bîlmezî ard ziwan ke derheqê Îmrali de rewşa ke endîşe dana hemverê tecrîdî de bêvengîya sazgehanê mîyanneteweyî ya. Bîlmezî aşkere kerd ke rewşa tewr talokeyî zî na ya û vînayişê xo bi nê vatişan qedêna: “Mîyanê Dengizê  Marmara de Birêz Ocalan û 3 kes estê û kes nêşkeno înan ra xeber bigîro. Ne heqê înan ê telefonî esto, ne êşkenê mektûb birûşnê, ne zî malbat û pawitoxê înan êşkenê şirê pêdiyayiş. Raştê îzolasyonê komî yenê.  


DÎHABER/STENBOL