ÎMZA

Qese esto vanê ‘tifong îcad bî, çerenî biye xirave’ Nika înternet vejiya, herkes bî roştber, herkes bî nustox.
Kam ke ABC zoneno roştber o, demê ma de.
Bi taybetiye însanê kurdî niya rê. Verva qomê xo bi dewlete ra benê jû, benê roştber. Çike dewlete înan vezena ver. Tîtel dana ci, vezena rojname û televîzyonanê xo kena roştber.
Leyla Zana jû roportaj de tayê çî vatî, nika înternet de jû lîsta nî roştberan fetelîna, yanê poşt danê vatîsanê Leyla Zana.
Tabî ma nêşîkîme qontrol bikerîme, rastî kam îmza da, ya zî nêda. Hesneme ke tayîne vato, ma îmza nêda. Naye rê îman nêbeno, çike nî mordemêke îmza xo înternet de fetelîna, besekenê bi eskerakerdîsedê nuskî fikrê xo homete de bare kerê. Hata ke niya nêkerdo, ma zî vame înan îmza da.
Kam ke qetilkaranê xorê tîvar keno û kam kê poşt dano na vatîs, gune bizonoke, qetilkaranê qomê xorê beno yardimkar. Zovîna manê naye çîno.
Jû sermiyanê dewleta qetilkare ra na vatîs ‘eke biwazo mesela halkeno’ çiyode bîn o, na vatîs ‘tivarê mi sermiyanê na dewlete rê esto, o na mesela halkeno’ çiyode bîn o.
Keso ke vatîsê 2îne vano û more keno, o poşt dano faşîzmê dewleta tirkî.
O, dardekerdena Şex Seîd more keno!
O, Tertelê Derê Zîlan more keno!
O, Tertelê Dersîm, dardekerdena Seyîd Rizayî more keno.
O, kistena Enes Ata more keno!
O, Tertelê Roboskî more keno!
O, hepisxanê Pozanti de domonanê kurdî rê taciz û tecawiz more keno.
O, kistena Kurdan bi kîmyasal hetê dewleta tirkî ra more keno.
O, Xîzan de qetilkerdena 15 ceniyanê kurdî more keno!
O, qedexê roşana Newroze more keno!
O, bi 10hezaran hepiskerdena Kurdan more keno!
O, en peyecoy Amed de qedexê mîtîngê 14ê Temuze more keno!
Çike hata ewro na dewlete, sermiyananê na dewlete rîwalê nî tertelan û zulm ra Kurdan ra lêborîne nêwasta.
Jû zî nî aqildarê dewlete gune bizonê ke, halkerdena na mesela Kurdan dest de niya, axayanê nî aqildaran dest dera, mordemê ke nî aqildarî cirê tîvar kenê, înan dest dera.