Reyna nizdîyê 400 komeleyê ke zafaneyê înan yê kurdan bî, ameyî padayîş û berê înan ame morkerdiş.Babete ser o Parlamenterê HDPyî Sirri Sureyya Onder û Hemsereka Kongreya Komelê Demokratîke (KCD) Leyla Guvene ke Edene de beşdarê werdê piştîdayîşî yê rêxistina partîya xo bîyî, qisey kerdî.
Ma ser payan de yê
Hemsereka KCDyî Leyla Guvene va ‘ma prosesêko muhîm û zorî ra vîyarenî’ û qiseykerdişê xo wina domna: “Tena yew hedefê AKP û Erdoganî esto û o zî bedilnayîşê sîstemî yo. Seba bedilnayîşê sîstemî zî hêrişê şarê kurdî kenî. Şarê kurd vera hêriş û tedayan de nêterseno. Sey ke Mehmet Tunçî vatêne, ‘Ma şima ver de sere nêronenî’ Yê ke xendekan de xeneqîyayî û vînî bîyî Efkan Ala û Davutoglu bî. Ma dê moralê xo xirab nêkerî û têkoşînê xo zî bi ruhêko azade bidomnî. Ma tîya de yî, payan ser de yî û înan ra nêtersenî. Serkewtiş yê ma yo.”
Qiseya peynî ma dê vajê
Parlementera HDP yê Edena Meral Danış Beştaş zî hayr ant muhîmîya paştîdayişî ser û vist vîrî ke vera Tirkîye demê derbe rameno. Beştaş da zonayen ke şarê Kurd gelenega xoverdayişî ra yena û va, ‘qiseya peynî ma dê vajê’.
Dima ra zî parlamenter Sirri Sureyya Onderî qisey kerd û wina va: “Ma dê nê çîyê ke bîyî, qet xo vîr ra mekerê û nêdî vîrîkerdiş zî. Ma dê her tim hetê mazluman de û vera zaliman de bibî. Çimkî ma zanî ke kesê ke ewro hetê kurdan de nêbî, dê siba hetê zaliman de bibî û hêrişê kurdan bikerî.”
Sebebê ci ters o
Onderî hayr ant mîtîngê CHPyî yê ‘Ma dê Tirkîyaye nêdî parçekerdiş’ ser û wina va: “Sîyaseto ke ma kenî sîyasetê etnîkî nîyo, sîyasetê şarî yo. Birêz Ocalan vatbî ‘Eke zulmê zalimî esto, yê ma zî rûmet û îzetê ma esto’ û destan nuştbî. Tena yew hêzê ma esto û o zî heqdarîya ma ya. Sebebê nê hêrişan ters û panîkê hukmatî yo. Ma dê piştî bidî yewbînan û tîk bivinderî. Ma dê bira û lajanê xo muhtacê namerdî nêkerî. No kar, karê pereyî nîyo, yê zerrî yo. Roje roja piştîdayîşêyewbînan a. Ya serkewtiş ya serkewtiş.“
DÎHABER/EDENA