Parlamenteranê HDPyî vera wezîferagirewtiş û tayînkerdişê qayûman de reaksîyon nîşan da. Parlamenteran dîyar kerd ke qayûm tayînkerdene derbe yo û da zanayene ke îqtîdarê AKP û MHPyî seba ke rewşa xo binimino, derbeyan virazeno. Parlamenteran bale ante ser tarzê çalakîya Gandîyî ser û va ‘ganî nê tarzê çalakîyan bêrî dewlemendkerdene’.

Vera wezîferagirîyayîş û herinda înan de tayînbîyayîşê qayûman yê şaredaranê Amed, Wan û Mêrdînî de hêrs û reaksîyonî dewam kenî. Xeylê bajaran de çalakîyê protestoyî yenî kerdene û heta nika xeylê çalakgêrî ameyî tepiştene. Rêxistinê bajar û qezayan yê HDPyî hetê polîsan ra girîyayî binê abluqa.

Parlamenterê HDPyî yê Şirnexî Hasan Ozguneşî dîyar kerd ke roja ke prosesê çareserîye ameyo qedênayene ra nata sere de Kurdî û heme muxalefet binê hêrişê topyekûnî de yî û da zanayene ke tayînbîyayîşê qayûman zî dewamê nê hêrişan o.

Ozguneşî dewamê qiseykerdişê xo de qala têkoşîno ke bêro dayene kerde û wina va: “Ma veng danî hêzanê demokrasî ke wa qayûman qebul nêkerî û vera nînan de reaksîyon nîşan bidî. Wa beşdarê çalakîyanê HDPyî bibî. Ma do nînan qebul nêkerî. Ganî ma tarzê çalakîya Gandîyî dewlemend bikerî û bidomnî. Ma no het de qerardar î ke bêveng nêmanî.”

Heme welatî rê hêriş ameyo kerdene

Parlamenterê HDPyî yê Stenbolî Mûsa Pîroglûyî zî wina va: “Ma her roje neheqîyêka bîne reyde têrî manenî. Referandûm reyde heme selahîyetî dîyayî Erdoganî. O wext ra nata ti manaya sindoqan nêmenda. Tîya de ya muhîme kerdişê ma yo. Ma do se bikerî? Hêrişê ke vera Amed, Wan û Mêrdînî de ameyî kerdene, heme welatî rê ameyî kerdene. Hêrişê îradeya şarî ameyo kerdene. Eke vernîya ci nêro girewtene, o wext do hêrişê bînî zî bibî. Ganî ma wayîrê îradeya xo bivejyî. Yan ma do pêro pîya serbikewî, yan zî welat do tarîtîya qesre de bimano. Coka ganî ma bivindarnî.”

AKP îradeya şarî nêşinasneno

Parlamentera HDPyî ya Wanî Muazzez Orhane zî qayûman sey derbe şinase kerde û wina va: “AKP roja sifteyîne ra nata yo ke îradeya şaran nêşinasneno. Xespkerdişê şaredarîye yeno manaya xespkerdişê îrade, fikir û cuya şarî. Ma senî verê cû wayîrê îradeya xo vejîyayî, ma do ewro zî bivejyî û qedexeyanê Wanî qebul nêkerî. Heta ke ma şaredarîyan tepîya gênî, ma do têkoşînê xo bidomnî. Ma veng danî herkesî ke wa pîya têkoşîn bidî û bêveng nêmanî.”

Qayûm çinîhesibîyayîşê îradeya şarî yo

Parlamenterê HDPyî yê Colemêrgî Saît Dedeyî zî va ‘îqtîdar hewl dano rewşa xo bi derbeyan binimino’ û wina domna: “Sewbîna çare nêvîneno. Qayûm yeno manaya çinîhesibîyayîşê demokrasî û îradeya şarî. Seba ke talanê xo biniminî, îradeya şarî çinî hesibnenî. Ewro şarê Wan, Mêrdîn û Amedî do wayîrê îradeya xo bivejyî. No tena şaranê Amed, Wan û Mêrdînî reyde eleqeder nîyo. Ewro Amed, Wan û Mêrdîn siba do Stenbol, Îzmîr û Anqara de bibo. Cok ra ganî herkes vengê xo bivejo. Çimkî beno ke siba erey bibo.”

 

AMED

 
 

Çi karê to şaredarîye de esto?

   

Badê ke qayûm tayînê Şaredarîya Bajarê Girdî ya Amedî bi, şar vernîya şaredarîye de ame têhet û reaksîyon nîşan da. Bi seyan kesî beşdarê çalakîye bîyî û nînan ra yewe zî Vînceroş Memo (Mehmet Kizilay) bi. Seke yeno zanayene Vînceroş Memo kesanê sembolan ra yew yê Amedî yo. Memoyî çalakîye de veng da Walîyê Amedî ke sey qayûmî tayînê şaredarîye bîyo û wina va: “Ma nêwazenî ke Amed wina bibo. Bi dizdî nêbena. Çi karê to şaredarîye de esto?”