Prosesê peyên de hêrişî zêde bîyî û kesê ke tewr zêde para xo hêrişan ra gênî zî rojnameger î. Goreyê ‘Raporê Endeksê Azadîya Çapemenîya Dinya ya 2017î’ ke Rojnamegerê ke Sînor Nasnêkenî amade kerdbî, Tirkîya 4 serrî apey şîya û mabênê 180 welatan de rêza 155. de ya. Eke Tirkîya 4 rêzê bînî zî apey şêra do bikewa lîsteya sîyaye û 12 serran de 56 rêzî apey şîya. Goreyê welatanê bînan Tirkîya bîya sey welatê tewqîfkerdişê rojnamegeran.Babete ser o rojnameger Tugba Tekereke qisey kerde.
Tekereke vist vîrî ke ‘seba dîyayîşê îxlalê heqan raporî lazim nîyî’ û wina va: “Tirkîya de rojnamegerî yena qetilkerdiş. Bi qetilkerdiş û tewqîfkerdişê rojnamegeran mesaj dîyeno komel û wazenî rojnamegeran bitersnî.”
Tekereke va ‘ma do raştîyan ra tavîz nêdî û her wext raştîyan binusî’ û wina qedenaye: “Ma bi heme rîsk û tehlukeyan dest bi rojnamegerî kerde. Hêzê rojnamegeran îqtîdarî tersneno. Rojnamegerî yena manaya vatişê raştîyan û tersayîşê îqtîdarî. Hêzê ma tîya ra yeno. Ma do bêters şêrî raştîyan ser de û raştîyan bivecî raste. Ma do vera kesê ke wazenî ma bêveng bikerî de têkoşîn bidî.”
ŞÛJIN/AMED