Parlamentera HDPyî ya Mêrdînî Pero Dundare tepiştişan ser o va ‘9ê teșrîna verêne de tepișîyayîșê rojnameger û sîyasetmedaran manîdar o'. Hemserekê Pêroyî yê HDPyî Sezaî Temellîyî zî dîyar kerd ke îșkencedîyayîșê tepișteyan ser o da zanayene ke ê do hemînan gerre bikerî.

Parlamentera HDPyî ya Mêrdînî Pero Dundare derheqê tepiştişan de va ‘îqtîdar wazeno heyfê weçînayîşanê 24ê hezîrane bigîro û amadekarîya weçînayîşê herêmî keno’. Hemserekê Pêroyî yê HDPyî Sezaî Temellîyî zî dîyar kerd ke Erdogan her roje îxbar keno û ê vera hêrişan de kampanyaya sîyasetê demokratîke daya dest pêkerdene.

Çend rojî verê 9 bajaran de 121 kesê mîyanê înan de rojnameger, sîyasetmedar û Dayîkê Aştîye estbî, ameyî tepiştene. Parlamentera HDPyî ya Mêrdînî Pero Dundare tepiştişan ser o qisey kerde û dîyar kerde ke bitaybetî rojnameger û cinîyî ameyî tepiştene.

Dundare va ‘nê tepiştişî seba heyfgirewtişê weçînayîşê 24ê hezîrane ameyî viraştene’ û wina domnaye: “No operasyon operasyonanê 2009î maneno. Ma eşkenî vajî ke 2009 ra nata operasyonî qet nêvindetî. Operasyon 9ê teşrîna verêne de ame viraştene û no zî manîdar o. Çimkî ewro roja destpêkê Komploya Mîyannetweyî yo û seba kurdan rojêka tarî yo.”

Dundare dîyar kerde ke îqtîdar cinîyan xo rê asteng vîneno û wina va: “Yê ke ameyî tepiştene, nîmeyê ci cinî yî. Seba ke îqtîdar cinîyan xo rê asteng vîneno, înan hedef gêno. Polîsan eşt ser keyeyê Leyla Guvene zî. Ê baş zanî ke Leyla zîndan de ya, labelê reyna zî berê aye şikit û kewtî zere. Dîyar beno ke no operasyon zuran ser o ameyo viraştene. Yê ke ameyî tepiştene, karê hemînan dîyar o. No hêriş kurdan û hetanê demokratîkan rê bîyo. No operasyon eynî wext de amadekarîya weçînayîşê herêmî yo. Îqtîdar wina hedef keno ke Amed, Mêrdîn û Wan de bi no hawa qezenç bikero. Ganî herkes vera nêyî de bivindero.”

 

Wazenî şarî bêveng bikerî

Dundare bale ante tepişîyayîşê rojnamegeran ser û wina va: “Çapemenîya cinîyan û çapemenîya kurdan ameyî hedef girewtene. Rojnamegerê ke vengê kurdan bi dinya dayênê eşnawitene, ameyî tepiştene. Wazenî şexsê çapemenîye de vengê şarî bibirnî. Ganî çapemenîya dinya zî hetê çapemenîya kurdan de ca bigîra.”

 

Erdogan her roje îxbar keno

Hemserekê Pêroyî yê HDPyî Sezaî Temellî zî bi îdarekaranê partîya xo ame Amed. Temellî awanîya partiye de kombîyayîşê çapemenîye organîze kerd. Temellîyî va ‘tepişîyayîşê embazanê ma nîşan dano ke îqtîdar Tirkîyayêka senîne wazeno?’ û wina dewam kerd: “Berê banan ameyî şikitene û îşkence bi embazanê ma ame kerdene. No senîn dozger o ke emrêko winasî dano? Wazenî bi şikitişê beran mesaj bidî. No senîn ehlaq o? Embazê ma Hîlmî Aydogdu emnîyet de qrîzê qelbî derbaz kerd. Herçiqas ke vano zî şîyayîşê ci yê nêweşxaneyî yeno asteng kerdene. Îxtîmalê merdişê embazê ma estbi. Avûkatê ke seba pawitişî şîyî, ameyî tepiştene. Nê tena çend nimune yî. Ma do hemînan gerre bikerî. Ma zanî ke kamî îxbar kerdo. Erdogan her roje îxbar keno. Xora Erdogan HDP meşrû nêvîneno. Ma vera hêrişan de kampanyaya sîyasetê demokratîke daya dest pêkerdene.”

 

MERKEZÊ XEBERAN