Hemeserekê Partîya Cuya Azade ya Kurdistanî (PJAK) Sîyamend Moûnîyî derheqê krîzê ekonomîk û sîyasî ke yeno cuyayîş û merkezê ci de Kurdistan esto de qisey kerd. Hemserekê PJAKî Moûnîyî qiseykerdişê xo de bale ant krîzê sîyasî, leşkerî, dîplomatîk û sîstemî ser û va ‘ganî prosesêko winasî de, waştişê şarî bi stratejîyêka ortaxe vejîyo vernîya şarî û seba nêyî yewîya neteweyî muhîm o’. 


Ganî piştî bidîyo 

Moûnîyî dewamê qiseykerdişê xo de va ‘ganî şarê kurd yewîya xo ya neteweyî awan bikero û bibo wayîrê strateyîyêka ortaxe’ û wina dewam kerd: “Ma sey partîyêka ke Rojhelatê Kurdistanî de têkoşîn danî, ma projeya ke şar bi konfederalîzma demokratîke bişînbo xo bi hawayo hîna baş îfade bikero, pêşnîyaz kenî. Ma seba ke bişînbî bi hêz û partîyanê Rojhelatê Kurdistanî reyde cepheyêko ortax awan bikerî, tayê pêvînayîşan kerd. Ma nika hewl danî na xebate hîna hîra bikerî. Nika KNK na xebate bi hawayo hîna hîra meşneno. Ma zî cepheyê xo de çi bikewo ser milê ma, ma amade yî ke bikerî. Çimkî ma zanî ke lazimîya şarê Kurdistanî bi vengêko ortax esto.” 


Zaf muhîm o 

Moûnîyî qiseykerdişê xo de va ‘xebata ke KNKyî seba yewîya neteweyî dayo destpêkerdiş, zaf muhîm o’ û wina dewam kerd: “Çimkî nika rewşa ke çar parçeyanê Kurdstanî de şarê ma tede yo, yewîya neteweyî ma ser de ferz kena. Na xebate seba Rojhelatê Kurdistanî hîna zaf mûhîm a. Ganî ma bizanî ke proseso ke ma tede yî zaf muhîm o û reyna ganî ma teberê menfîetê şexsî û partî de na babete bigîrî dest û wina nizdî bibî. Ma ancax bi hawayo seyyewbînan, demokratîke, azadîwaştox û şorişger eşkenî nê krîzî ra bivejyî.”


Yê ma bedilîyayîş o 

Moûnîyî qala averşîyayîşê ke dinya de benî kerd û wina va: “Ewro îdareyê Amerîka yo newe, çîyê Herêma Kendawe de yenî cuyayîş, şero ke Iraq û Sûrîye de dewam keno, Îran ser de bedilîyayîşanê neweyan danî ferzkerdiş. Merkezê krîzî her ke şono ver bi Kurdistanî ra şemitîyeno. Peynîya peynî Îran ser de zî do tesîr bikero. Vernîya Îranî de 2 weçîniteyî estî; Ya Îran do demokratîk bibo yan zî do bibo Sûrîye. Tercîho 2. do seba şaranê Îranî felaket bîyaro. Tercîhê PJAKî o yo ke Îran bedilîyayîşanê demokratîkan esas bigîro. Labelê eke no nêbo zî Kurdistan do bi her hawayî xo bipawo. Ma qasî nêyî wayîrê tecrube û hêzî yî. Wa şikê ti kesî nêbo ke ma do xo bipawî. Seba nêyî bi her hawayî amadekarîyê ma estî.”


ANF/MEHABAD