Zîhnîyeto serdest bi rayîrê bername û televîzyonan, rolê cîya-cîyayan dano cinî û camêrdan. Bernameyê TVyan de cinîyî sey hacete yenê xebetnayîş û hedefê zîhnîyetê serdestî, komel de bêerjkerdişê cinîyan o. Bi rayîrê bernameyê TVyan, mesajê rolê cinî dîyeno komel û bi no hawa fehmêko serdest komel de virazîyeno.Babete ser o aktîvîsta VAKADî Songul Ozunvere qisey kerde.
Bernameyî zêde benî
Songul Ozunvere qiseykerdişê xo de bale ante zîhnîyeto serdest ser û wina va: “Camêrdêk eşkeno derheqê cinîyan de qerar bigîro. Cinîyî bernameyan de yenê pêşkêş kerdene û bi no hawa cinîyî komel de bêerj kenî. Nê bernameyî çîyêk zî nêdanê cinîyan û cinîyan mecburê zewacî kenî. Bernameyê cêzî, bernameyê xo teqdîmkerdişî û şamî, zîhnîyeto serdest ra xizmet kenî. Zaf ecêb o ke hûmara nê bernameyan zî her ke şono zêde bena. Bi saya nê bernameyan, zîhnîyeto serdest prîm qezenç keno. Vîşêrê zîhnîyeto sedest ti feydeyê bernameyan kesêk rê çin o.”
Reklaman de yenî xebetnayîş
Ozunvere dîyar kerde ke lazimîya cinîyan bi hetkarîye esta û qiseykerdişê xo wina qedênaye: “Bernameyê TVyan cinîyan hepsê keyeyî kenî. Xo ra zîhnîyeto serdest zî azadîya cinîyan hedef gêno. Mesajê hepiskerdişê cinîyan tena bi bernameyan nê, bi reklaman de zî dîyeno. Fînak, reklaman de kesa ke pakî kena her tim cinî ya û kesê ke wesayîtî pêşkeşê şarî kena zî cinî ya. Bername û reklaman de cinîyî sey ke mecbûrê camêrdî bî, yenê nîşandayîş. Bi no hawa zî komel de tacîz û îstîsmar normal yenî dîyayîş.”
ŞÛJIN/WAN