Berpirsîyarê Karê teberî yê PYDyî Salîh Muslîmî dîyar kerd ke dewleta Tirkîye de zihnîyetê Îttîhat û Terakkî xo kerdo newe, no zî hem seba kurdan hem zî Rojawanê Mîyanênî tehdîtêko cidî yo û va: “Tirkîye rolo ke seba newe ra dîzaynkerdişê Rojhelato Mîyanênî dîyayo ci bica nêana.”

Berpirsîyarê Karê teberî yê Partîya Yewîya Demokratîke (PYD) Salîh Muslîmî derheqê tehdîdanê serekkomarê Tirkîye Recep Tayyîp Erdoganî de qisey kerd.  Muslîmî qiseykerdişê xo de bale ant pêvînayîşanê mabênê Tirkîye û Amerîka ser û va ‘ma nêzanê binê masa de çi têgêreno.’

Muslîmî destpêkê qiseykerdişê xo de va ‘Erdoganî MHP, Ergenekon, Hîzbullah û sûcdaranê serranê 90an reyde îtîfaq viraşto’ û wina domna: “Goreyê vînayîşê ma no newekerdişê zihnîyetê Îttîhat û Terakkî yo. Bi nê îtîfaqê neweyî na rey wazenê Kurdan raşte ra wedarê.”    

Erdogan tehlukeyêko pîl o

Muslîmî dewamê qiseykerdişê xo de da zanayene ke vernîya kurdan de tehlukeyêko pîl esto û nê bestî pa: “No zihnîyetê Îttîhat û Terakkî bi mentiqê ‘Kurdo tewr rind Kurdo merde yo’ nizd beno. Serê kurdan de tehdîdêko pîl esto, la no bi kurdan bisînor nêyo. Mesela ê kewtî Îdlîb û şarê Erebî rê zî zulm kerdî. Wazenê Heleb ra heta Mosil ûca ra heta Kerkuk bigîrê, no Mîsaqo Milî yo newe yo. No qirkerdiş tenya do bi kurdan bisînor nêmano, dore do bêro şaranê bînan zî.”

Ma xo sepernenê şarê xo

Muslîmî qiseykerdişê xo de va ‘Tirkîye rolo ke seba newe ra dîzaynkerdişê Rojhelato Mîyanênî dîyayo ci bica nêana û bi goreyê planê xo rayra şona’ û wina domna: “Seba bicaardişê nê planê xo hemeyê terorîstan şuxulnayî. DAIŞ şuxulna, El Nusra şuxulna. Kurdan hemverê DAIŞî de şer kerd û wareyê mîyanneteweyîyî de bî aktîf. Tirkîye ameye nuqteya ke ‘wa kurdî nêbê wayîrê çîyêk, kam çi wazeno ez do bidî ci.’ Bewlî bi ke tenya qismêkê kurdan nê tu kurdêk qebûl nêkena û wazena ke hemine ra bixelesîya. Şarê ke herême de yê bê hêzê xo yê cewherîyî xo nêsepernenê yewna hêzî. Bombayê ke Efrîn de ma ser o varayêne yê NATO bî. Tirkîye ge kîşta NATOyî de ge kîşta Rûsya de sîyasetêkê pragmatîkî rayra bena. La ma hêzê şarê xo ra bawer kenê.”   

Amerîka nêwazena

Muslîmî peynîya qiseykerdişê xo de înan ard ziwan ser: “Amerîka hetêk ra nêwazena kurdan ca verda, hetêna ra zî destê aye Tirkîye ra nêbena. Tirkîye endamê NATOyî ya û Amerîka reyde ya. Ma rê çîyo muhîm nêyo ke wa têkilîyê mabênê Amerîka û Tirkîye têkilîyê ke zirar danê ma ra nêbê. La Tirkîye tim vana ‘ya ez ya ê.’ Amerîka nêwazena ma vîndî bikera û nêwazena Tirkîye zî vîndî bikera. Tirkîye bi nê sîyasetê xo tenya seba kurdan nê seba hemeyê Rojhelato Mîyanênî û seba hemeyê dinya tehluke ya.”

 

 QAMIŞLO