Pandemîya Vîrusê Koronayî pêroyina Dinya û Kurdistanî rê hem hetê weşîye ra hem zî hetê ekonomîkî ra tesîrêkê girde kena. Pêroyina Dinya de kesê ke vîrûsî ra kewtî humara înan nêzdî 2 mîlyonê ra resa û Tirkîya de zî na hûmare resa 70 hezar ê. Nika Nêweşxaneyê Tirkîya de ekîpmanê weşî zaf bi kem ê, hepisxaneyê Tirkîya de zî kelmelê pankî ra taybetî hepsê sîyasî nêeşkenî biresî. Janê Vîrûsê Koronayî yê resayişê Mersînî ser o Hemserekê Mersînî yê SESî Dr. Zekî Sînan Dogan û Serekê Odeya Tabîbî yê Mersînî Dr. Mehmet Antmen ajansê Pîrhayî ra qise kerdê. Hemserekê Mersînî yê SESÎ Dr. Zekî Dogan aşkera kerd ke Mersîn de hetanî nika 2 doktor û 2 hemşîrayê Vîrûsê Koronayî ra kewtê, nêweşxaneyan de kelmelê lepik, sîper û tulumî ameyî tedarîkkerdiş la ASMyan de nê kelmelî çi heyfo ke nêameyî tedarîkkerdiş û wina vat: “Eke wazîyeno xizmetê weşîye bidomyo ganîyo ke xebatkarê weşî hem hetê psîkolojî hem zî hetê laşî ra bêrê pawitişî. Ma sey sendîkaye, şarê xo veng danî ke wa keyeyanê xo ra bimanê. Welatijan tersê COVÎD-19î muracatê nêweşxaneyan nêkenê, no ser zî ganî tena çend nêweşxaneyê, sey merkezê pandemîye bêrê îlankerdiş.” Pêroyina welatî de rewş weş nîya Serekê Odeya Tabîbî yê Mersînî Dr. Mehmet Antmen zî wina domna: “Hetanî nika Mersîn de 2 kesê vîrûsî cuya xo dayê, û 60 kesê zî vîrûsî ra kewtê. Goreyê mi pêroyina welatî de rewş weş nîya. Ma hûmara ma ya kesê ke vîrûsî ra kewtê Dinya resa rêza hîrêyine. Ma sey TTB, wazenî ke pêroyina welatî de ganî îzolasyonêko bi dijwar bêro îlankerdiş.” MERKEZÊ XEBERAN