Konseya Rayverîn ê KNK, bi wesîleyê 102 Serragêra Qirkerdişê 1915’î îzahatekê nuştekî weşîna û vist vîrî ke, Împaratorîya Osmanîyan û pîyakaranê înan, serra 1915’î de dûştê şaranê xirîstîyan, ke cografyaya Mezopotamya û Anatolîya de ciwîyenê qirkerdişeke viraşt.
KNK aşkere kerd ke na qirkerdişî de Rayveberanê Cemîyetê Îttihat Terakî, çeteyê Teşkîlatê Mexsûsa, Alayê Hemîdîyê û artêşa Osmanîyan hemverê mordemîye sûc kerdê.
Îzahatî de vajîya ke şarê Ermenî û Asûrî-Suryanî-Keldanî, seba ke tarîx û kulturê înan werte ra wedarnê, amey qir kerden û wina dewam kerd: “No qirkerdiş vera mordemîye sûcêko ke ne mumkin o bîro înkarkerdiş o. Belgeya verçim û heqîqî hûmara kiştişê mîlyonek û nîm ra vêşêr mordeman a. Qeydê nifûsa Împaratorîya Osmanîyan zî na raştî teyîd kenê.”
Se hezarî kes amey sirgûnkerdiş
Konseya Rayverînê KNK vist vîrî ke şarê Asûrî-Suryanî-Keldanî ra vêşêr nîm milyon, şarê Ermenî ra zî mîlyonekê ra vêşêr însanî bi barbarî û bi renganê ciya û cayanê ciya de amey kiştiş û wina va: “Se hezarî kes zî ca û waranê xo ra, bi Qanûnê Tehcîrî amey sirgûnkerdiş. Bi des hezaran, vêşêr doman keyna û cinîyê genc amey misilmankerdiş û bi hawayekî xeyrî însanî, bi zorî amey zewijnayen. Bi hezaran cayê zey dêr û manastir, dibistan, pirtûkxane û kargeh amey wêrankerdiş. Mal, milk û dewlemendî amey xespkerdiş. Bi vengdayîşê cîhadî û fermanan paksazîya etnîk û dînî amê kerdiş.”
Hona zî zey qirkerdiş qebûl nêkenê
KNK diyar kerd ke na dirbeta jenosîdê ra hona zî gonî yena û dewamê de vat: “Na travmaya ke serê nê şaran ra amê, se û di serrî ser nifşanê newî de bîya trajedîyeke tal û tûnî. Ser jenosîdî ra se û di serrî ravêrdî, Komara Tirkîye ke mîraswêra Împaratorîya Osmanîyan a, na qirkerdişî qebûl nêkena, bena pîyakarê sûcî. No zî yeno maneya ramitişê jenosîdî.”
KNK bi munasebeta 102. serragêra jenosîdê 1915î veng da Komara Tirkîye ke qirkerdiş qebûl bikero û hewcedarîyanê ci bîyaro ca. Tewr peynî de Konseya Rayverînê KNK jenosîdê 1915î reyna şermezar kerd û waşt ke hetê pêrokîn dezgehanê eleqedar ra bîro qebûlkerdiş.
BRUKSEL