Ji bo 18 PKK'yiyên di dem û cihên cûda de jiyana xwe ji dest dane li gundê Qers a girêdayê bajaroka Purxusê ya navçeya Xelatê ya Bedlîsê mewlûd hat dan. Tevî gelek hemwelatiyan parlementerê BDP'ê yê Bedlîsê Husametîn Zenderlîoglu, parlementerê Mûşê Sirri Sakik, Serokê Rêxistina BDP'ê ya Bedlîsê Mehmet Can Demîr, Şaredarê Tetwanê Abdullah Ok, Şaredarê Norşînê M. Emîn Ozkan, rêveberên rêxistinên BDP'ê yên navçe û bajarên Bedlîs û Mûşê, rêveberên MEYA-DER'ê yên Mûş û Bedlîsê beşdarê mewlûdê bûn. Di mewlûdê de Serokê Rêxistina BDP'ê ya Bedlîsê Mehmet Can Demîr, axivî û got "Ji bo em layiqê şehîdên xwe bibin û têkoşîna daye destpêkirin bilind bikin û bigihijin serkeftinê tiştê ji destê me bê em dê bikin."

Parlementerê BDP'ê ya Bedlîsê Zenderlîoglu jî, diyar kir ku gelê Kurd di çar perçeyan de li ser linga ne û da zanîn ku Kurdan dema xwe ya hişyariyê temam kiriye û êdî pêvajoya bidestxistina deskeftiyan destpê kiriye. Zenderlîoglu, destnîşan kir ku têkoşîna ji roja destpêkiriye heta niha fêkiyên têkoşîna bi keda gelê Kurd bilind kiriye hêdî hêdî dicivîn e û ev tişt gotin: "Gelê me pêşî rabû ser piyan û niha jî dest bi deskeftiyan bidest dixe. Bila dost-dijmin her kes zanibe ku gelê Kurd heta azadiya xwe nestîne dê dawî li têkoşîna xwe neyine. Di berê de kesên me tune dihesiband îro neçar mane bi serokatiya me re muzakereyê bike. Ev yek jî bi keda hatî dayîn û xwîna şehîdên me pêk hatiye. Ji ber di çar perçeyên Kurdistanê têkoşîneke bi rûmet dane û têkoşîneke lehengî dane meşandin ji gerîla û gelê Kurd re spas dikin. Heta dawiya xwîna me em dê bi şehît û têkoşîna xwe re bin. Careke din ji hemû malbatên şehîdên me re sersaxiyê dixwazin, li ber têkoşîna rêhevalên xwe bi rêzdarî bejna xwe ditewîn im."
Piştî axaftinan xwarin li beşdaran hat belavkirin.

DÎHA/BEDLÎS