'Ev biryar ji bo nixumandine ye'
Encu da xuyakirin ku biryara dadgeriya Danîmarkayê ya betalkirina lîsansên MMC, ROJ TV û NÛÇE TV nayê qebûlkirin û got, "Em dizanin ku ev biryar ji bo nixumandina zilma li Kurdistanê hatiye dayîn e. Weke ku tê zanîn, roja komkujiya Roboskî rû da, çapemeniya li Tirkiyê ya navendî, nexwest komkujiyê bibîne, hewl da komkujiyê rewa nîşan bide û ket nava hewldanên manîpulekirinê. Ya ku ev komkujî hînê di saeta destpêkê de bi raya giştî re parve kir, ROJ TV ye. Ji ber vê yekê em bang li hukûmeta Danîmarkayê dikin, ku tavilê ji vê biryara xwe ya şaş vegere. Em eşkere dikin, ku ji bo hukûmeta Danîmarka ji biryara xwe ya şaş vegere, dest bi kampanya îmzeyan dikin. Îmzeyên li Roboskî hatin komkirin, emê ji hukûmeta Danîmarkayê re ragihînin."
ŞIRNEX
HDK'ê li dijî Danîmarka nerazîbûn nîşan da
Meclîsa Amed a Kongreya Demokratîk a Gelan bang li Danîmarkaya ku lîsansa kanalên, NÛÇE TV, ROJ TV û MMC betal kir da ku wê biryarê paşde bikişîne.
Di daxuyaniya ji aliyê meclîsê hat kirin de hat destnîşankirin ku di merheleya 2’yemîn a pêvajoya çareseriyê de gengeşeyên ku pêvajoyê sabote dikin li pey hevdu rû didin û biryara Dadgeha Kopenhagê ya der barê ROJ TV, NÛÇE TV û MMC de jî di vê çarçoveyê de hat nirxandin.
Di daxuyaniyê de hat ziman ku bi israr gelê Kurd ji mafê agahî wergirtina bi zimanê xwe bêpar tê hiştin û ev maf tê astengkirin. Daxuyanî wiha berdewam dike: “Betalkirina lîsansan darbeyeke mezin e ya li hemberî çapemeniya azad û bi awayekî azad agahî û nûçe wergirtina gelê Kurd. Di demên pêşiya me de em ê bibînin bê ev biryar di encama çi bazariyan de hatiye girtin.”
Di berdewamiya daxuyaniya HDK’ê de ev xusûs tên destnîşankirin: “Gelê Kurd tu carî serî li hemberî neheqiyan netewandiye û bêdeng nemaye. Em bang li gelê xwe yê li herêmê, Ewropa û her wiha parêzvanên çapemenî û ragihandina azad dikin da ku li NÛÇE TV, ROJ TV û MMC xwedî derkevin. Û em bang li Danîmarkayê jî dikin da ku tavilê dest ji vê biryara dij-huqûqî berde.”
AMED
Çapemeniya azad nayê astengkirin
Yekitiya Rojnamevanên Kurdistanê ya Ewropayê (YRKE) li dijî biryara Dadgeha Eyaletê ya Kopenhagê ya betalkirin lîsansên weşanê yên ROJ TV, NÛÇE TV û MMC, nerazîbûneke tund nîşan da. Di daxuyaniya nivîskî ya YRKE de hat destnîşankirin, ku biryar di warê azadiya çapemeniyê û azadiyên bingehîn de nayê qebûlkirin.
Di daxuyaniyê de hat ragihandin ku bi vê biryarê re darbe li mafê nûçegirtinê yê gelê Kurd hatiye xistin û weha hat gotin: "Bi vê biryara cihê şermê ya dadgehê re, qenala muzîkê ya dewlemendiya çandî ya gelê Kurd nîşan dide û dengê gelê Kurd NÛÇE û ROJ TV, tên girtin.
Ev televîzyonên mijara gotinê, ji roja dest bi weşanê kir heta roja îro li dijî gef, şantajên aborî û siyasî û zextên hukûmet û dewleta Tirk serî netewandin û ji azadî û rûmeta çapemeniyê ti carî venegeriya. Lê belê di encama hesabên siyasî yê navnetewî de ev televîzyon lîsansên wan hatin betalkirin û bi vî rengî darbe li mafê nûçegirtinê yê gelê Kurd hat xistin. Saziyên lîsansê heta niha di weşana van televîzyonan de li rewşeke "sûc" rast nehatine û diyar e ku ev biryara bi maskeya huqûqê hatiye stendin, siyasî ye."
YRKE da xuyakirin ku talankirina mafê gelê Kurd ê nûçegirtinê bi biryara dadgehê nayê qebûlkirin û got, "Em di wê baweriyê de ne ku dîrok û mirovahî wê, kesên ev biryar stendin, mehkûm bike."
YRKE bang li raya giştî kir ku di kesayetiya MMC, NÛÇE TV û ROJ TV de xwedî li azadî û mafên bingehîn û azadiya çapemeniyê derkevin û bi qenalên mijara gotinê re di nava hevkarî û piştgiriyê de bin.
BRUKSEL