Li Rojava, Saziya Zimanê Kurdî SZK’ê li parka Navenda Çand û Hunerê ya Dirbêsiyê bi şahiyekê bawernameyên zimanê Kurdî li 110 xwendekarên xwe yên ku dewreya zimanê Kurdî bi dawî kirin belav kir. Her wiha di heman  şahiyê de meclîsa tendirustiyê bawernameyên tendirustiyê da 20 kesên ku tevlî dewreya tendirustiyê bûbûn.
Endamê Tevgera Civaka Demokratîk (TEV-DEM) Dildar Ehmed di şahiyê de axivî û balkişand ser siyaseta înkar û tunekirinê ya li ser zimanê Kurdî. Ehmed diyar kir ku êdî gelê Kurd destûr nade feraseta înkar û asîmîlasyonê. Li ser navê Saziya Zimanê Kurdî SZK’ê jî Bedran Penaber axivî û diyar kir ku ew di her şert û mercî de xebatên zimanê Kurdî pêş bixin û xwedî li zimanê xwe derbikevin.

Piştre xelata wêjevan Hisên Feqe ya ku SZK’ê li Stembolê wergirtibû nîşanî beşdaran hate kirin. Şahî bi belavkirina bawernameyan li xwendekaran û 20 spasnameyan ji SZK’ê ji bo mamosteyên ziman dewam kir.  Di şahiyê de helbestvan Ferhad Merdê, Hunermend Elî Mensûr û Koma Zîlan helbest û stran pêşkêşkirin.


ANHA/DIRBÊSIYÊ