ŞÎNDA EKREM
ANHA / QAMIŞLO
Koordînasyonê Herêma Cizîrî yê Komîteya Perwerdeyê Komelê Demokratîke (KPC-D) ilmê Jineolojîyî akademîyanê Vakurê Sûrîye ra kirişte heme mektebanê Herêma Cizîrî. Komîteya Perwerdeyî yê Komelê Demokratîke 2015 de ilmê Jineolojîyî heme materyalanê perwerdeyî de bica kerdbî û sey madeya perwerdeyî ya esasî qebul kerdbî. Perwerdeyê Jineolojîyî ewil 2016 de Efrîn de, dima ra Kobanê de dest bi dayîşê ci amebî kerdene.
Endama KPCD Nûpel Izedîn Ehmede daye zanayene ke komelo azade bi camêrdo îqtîdarperest û cinîya kole reyde awan nêbeno û ancax Jineolojî nê problemî çareser keno. Endama Akademîya Jineolojîyî Şîlan Mihemede zî va ‘ma ewil mamotayî resnayî’ û wina dewam kerde: “Ma nika bi erebkî û kurdî perwerde danî. Seba ke perwerdeyê suryanîkî zî bidîyo, xebatê ma dewam kenî.”
Lava Berkoye zî dîyar kerde ke wendekaran verê cû qet nameyê Jineolojîyî nêeşnawito û her ke şono hûmara wendekaran zêdeyena. Ayenda Hisoye zî va ‘seba ke mi zaf waşt, mi dest bi dîyayîşê perwerdeyî kerd’ û wina dewam kerde: “Ganî bireso hîna zaf kesan.” Cinîyan ra Loranda Xelîle zî arde ziwan ke ê tarîxê cinîyan bi ilmê Jineolojîyî musenî. Mamosta Muhdîyê Mihemede va ‘nika camêrdî zî eleqeyêko gird nîşanê Jineolojîyî danî’. Şîyar Hisoyî zî va ‘ganî herkes perwerdeyê nê ilmî bivîno’.