Siyaseta esasî gureyînê ziwanî ya
Ewro Jiyan TV weşan keno. Programê ci estê. Ekîbê ci xurt o. Îmkanê înan ê teknîkî zî estê. Labelê jû TV temaşe û nîyadayîşî wazeno, alaqa wazeno, reklaman wazeno,wazeno ke millete xo miyan de qalê ci biko, paştî wazeno. Eke Jiyan TV alaqa nêvîno; beno ke weşanê zazakî ra fek verado. Wexto ke no TV weşanê zazakî ra fek verado,îhtîmalêko pîl do heya 10 serrî televîzyonêko zazakî amebo.No semed ra kamî dest ra çi yeno lazim o seferberê ziwanê xo biko.En sifte lazimo ke keye de her kes Jiyan TV ser o biko. Bido şinasnayîş. Rexne biko. Fikr û vatişanê xo bîyro ziwan.Kesê ke wayîrê fîrma û dikananê lazim o ke reklamanê xo bidê Jiyan TV.Lazim o ke kesê ke alaqadarê ziwanîyê, şêrê paştî bidê ci.
Ma nêbê kermê dar
Hunermend û dêrvajî bi hunerê xo reng bidê Jiyan TV. Keso ke seba ziwanî zerreyê înan dejeno, wa sîyaset ra fek veradê. Sîyaseta esasî xebatê ziwanî ya. Propagandaya qilêrine ra fek veradê. Wa şar nêvajo: “Kermê darî darî ra yo”.. Ma nêbê kerm, bibime dar. Ma bi xirabî ney¸ bi rindeye nêzdîyê nê televîzyonî bibim. Çira nameyê ci Jiyan TV yo? Çira nameyê ci bi kirmanckî nîyo? La nê vatişanê xo ma bi ziwanêko weşa vajim û ma însanan ci ra serdin mekim. Ma nameyê ci xirab mekim.Eke ma xo miyan de nêbê yew; ne kamîya ma manena ne zî ziwanê ma.
KEMAL ŞÎMŞEK