Festîvala Dersim ke bi şîyara “Qirkerdişê xoza, kamî, îtiqat û kulturî rê nê” roja îne bi panelê “Pencike qirkerdişî de Dersim” û bi cemê yewîye destpa kerd, roja Şeme zî dewam kerd. Bi hezaran Dersimijî û dostê ci festîval de amey têlewe û vera AKP vengdayîşê têkoşînê wertex day.
Festîvala ke bi kirmanckî pêşkeşîya ci amê kerden de xêlê kultur, reng û vengî amey têlewe. Cinî bi kinc û renganê xo yê herêmî tewrê festîval bî. Rixmê varonê şiliyê festîval bi bernameyeke dekerde heta bereyîya şenî dewam kerd. Meydanê festîval de xêlê sembol û rengê Dersim amey damûsnayîş. Meydanê festîval de posterê Seyîd Riza, Alîşêr û Zarîfe, yê Mazlum Dogan û Îbrahîm Kaypakkaya, Sakîne Cansiz, Ûlaş Bayraktaroglû, Ayşe Denîz Karacagîl amey aliqnayen.
Vera AKP têkoşîna wertex
Parlamenterê Dersim Alîcan Onlu, Sîyasetmedar Hatîp Dîcle, Hemserokê HDK-A Demîr Çelîk ra pîya xêlê kesî vejyay ser sehne û mesajê xo day. Qiseyan de hayr ancîya tarîx ra na het polîtîkayanê qirkerdişî yê vera Kurdan ser. Herzewbîn hemverê AKP zî vengdayîşê têkoşîna wertex ame kerdiş.
Festîval de Grûbe zey Sîmûrg, Denge Xweza, Grûbe Mûnzûr, Ûmût Altınçag, Hasan Saglam û Gulseren Kiliç zî vejyay ser sehne. Herzewbîn performansê dans yê komanê cîya ra pîya, grûbe tîyatro Arêyê Kay zî bi kayê xo eleqeyêka pîl ant ser xo. Seba domanan cayekê hera yê kayî ame abirnayen. Herzewbîn rîyê domanan amey boyaxkerden. Festîval heta bereyîya seatanê şanî, bi antişê govende dewam kerd.
FRANKFÛRT