Jû weçînîtîs beno. Tayê dersîmizî zemeqiyê dimê CHP ra merdanê xorê heqeret kenê. Gorê nî dersîmizan, BDP û HDP reyanê CHP cenê, AKP rê yardim kenê û niya xayîniye kenê. Nî tayê dersîmizî rind zonenê ke AKP û CHP wayî yê û tîra xo erzenê jû gol.
Ravêr ma naye vajîme: AKP bi destê CHP biye pîle. CHP vurnayena qanunî de AKP rê yardim kerd û niya siyaset de raya  Recep Tayyîp Erdogan kerde ra. Kam xayîn o? AKP ke ewro serdest a, no sayiya CHP dero.
Sarê Dersimi gune kerdîsanê CHP  biyaro xo vîrî. Ataturk mavênê serranê 1919 û 1921 de dersîmizê yemê Qoçgîrî qirkerdî. Bi seyan dewê nî însanan sanayî adirî ver û talan kerdî. Na biyayîs ra dima onca bi emrê Ataturk Tertelê Dersîmî virajiya. Bi 10hezaran dersîmizî ameyî qetil kerdene. No Tertele hetê CHP ra ame organîze kerdene. Tayê dersîmizêke biyê dimoçikê CHP, naye çitur înkar kenê?
Eskeranê Ataturk bi sungiyan pîzê ceniyan de domonê soykekî sungî kerdî, fîştî hewa sanayî ra. Sima, tayê dersîmizê CHPyîz naye çitur qebul kenê û qomê xorê na xayîniye kenê?
Eskeranê dewleta tirkî yê demê 38 însanê Dersîm rê zulm, taciz û tecawiz kerd. Çenekanê ma yê ozevan nêwast bedenê xo teslîmê eskeranê Ataturk û CHP kerê, na rîwal ra xo aşeyan ra est. Sima, tayê dersîmizê CHPyîz naye çitur xo vîra kenê û nika CHP rê gureyenê?
Mehkemanê Ataturk û CHP serrê lazê Seyîd Rizayî kerdî berz, yê Seyîd Rizayî dayî waro û piya darde kerdî. Cayê mezelanê Şehîdanê ma yê Meydanê Genimî hona nênê zonayene. Sima, tayê dersîmizê CHPyîz naye çitur nêanê ra xo vîrî û gonewera Rayveranê ma CHP rê yardim kenê?
Nika hona çenekê dersîmizyêke hetê eskeranê Ataturk û CHP ra amê remnayenê, belgefîlman de qesey kenê. Dewleta CHP o waxt çi ardo sarê miletê ser, nî çenekê dersîmizî zelal zelal anê ra zon. Malbatê ma 38 de çitur amê pirtley kerdene, nî çenekî hebe bi hebe anê verê çimanê ma. Sima, tayê dersîmizê CHPyîz naye çitur nêvînenê û ketê binê çenganê CHP cirê benê quwete?
Bêrîme waxtê ma. Onur Oymenê CHPyîz vat, "Dersîm de mayî berbê, se biyo?" Onca Akîf Hamzaçebî’yê CHPyîz vat, "lewê CHP de îtîbarê Seyîd Rizayî çîno ke, peyser ci dîme." Huseyîn Aygun vat, "andimiz kamî ça nêrehet keno..." Û Kemal Kiliçdaroglu vat, "zonê mayande perverde nêbeno, welat beno leteyî." Sima, tayê dersîmizêke sewûroz vanê "zonê ma, zonê ma" qey nî vatîsan rê bêveng manenê û sermiyana qetlîamê Dersîmî CHP rê yardim kenê?
Pekî na hal de xayîn kam o?