Dimayê hêrişanê Tirkîya yê serê Vakur û Rojhelatê Sûrîye, zafê welatan peymanê rotişê sîlehan yê seba Tirkîya vindarnayî. Wezaretê Karanê Teberî yê Kanada zî da zanayene ke Hukmatê Kanada rotişê sîlehanê seba Tirkîya vindarna. Îzehet de ameyo vatene ke hêrişê dagîrkerîye rewşa nikayêne de do zîyanêko pîl bido aramîya herême û qezencanê ke heta nika vera DAÎŞî de ameyî destfistene. Hedîseyanê peyênan ra dima Hukmatê Kanada seba wextêk destûrê tîcaretî yê newîye yê seba Tirkîya vindarneno.” Goreyê daneyanê hukmatê Kanada, serra 2018 de Kanada Tirkîya rê qasê 116 mîlyon dolarî sîlehî rotbî Wezaretê Karanê Teberî yê Îspanya zî îzehetêk da ke Îspanya hemparanê xo yê hemkaran reyde Yewîya Ewropa de hêrişê serê Sûrîye tesdîq nêkena û naye ra lîsansê seba tîcaretê sîlehan yê newe nêdana.
Yeno zanayene ke verê cû welatanê Fînlandîya, Almanya, Îngîlistan, Norveç û Hollanda yew bi yew dabî zanayene ke ê hêrişê Tirkîya tesdîq nêkenî û qerar girewtbî ke ê do seba demêk sîleh nêroşî Tirkîya.
OTTAWA