9 dewanê qezaya Mêrdîn Nisêbîn  de 11’ê Sibate de qedexeyê vejyayîşê teberî îlan bi. Herzewbîn dewa Nisêbîn Xerabê Bava ke heta nika 5 kes amey kiştiş û 39 kes amey binçim girewtiş de 13 rojî yo ablûqa ramena. Walîtî vizêr zî 2 dewanê bînî de qedexe îlan kerd. 

9 dewanê Nisêbîn de îlankerdişê qedexe ra dima Tîmanê Taybet 11ê Sibate de eştî dewa Xerabê Bava ser û 3 kesan kiştî, 39 kesan zî meydanê dew de kerdî viran û îşkenceyê ci kerdî. Îşkence ra dima 39 dewijî girotîyay bin çiman. Dima ra ame dîyar kerdiş ke 2 kesê bînî bin çiman de amey vinî kerdiş û dima ra amey kiştiş. Dewa Xerabê Bava de qedexe ra pîya ablûqaya lejkerî zî ramena. 

Walîtiyê sûk vizêr 2 dewanê bînî yê bi nameyê Cibilgirav û Talat de zî seat 08:00 ra tepya xedexe  îlan kerd. 

Camêrdê 57 serrî rê îşkenceyê giran

Heto bîn ra jew resimê dewijê Xerabê Bava Abdî Aykût o 57 serre ke bi îşkence girotîyabi bin çiman û bi rojano ci ra xeber nêamê girewten vejîya. 

Aykût ke raştê îşkenceyê giran ame, 19ê Sibate de verîya ke wedarîyo nêweşxane. Resimê Aykûtî ke verîya ke wedarîyo nêweşxane ancîyayo de rêçê îşkence aysenê. Abdî Aykût ke wedarîya nêweşxane, dima ra qeydê ci yê nêweşxane amey pakkerdiş û dima ra wextekê ci ra xeber nêamê girewten.  La vizêr vejîya werte ke Aykût Nêweşxaneyê Dewlet yê Mêrdîn de yo.  

Karayîlanî veng da 

Heto bîn ra Endamê Komîteya Rayverîn ê PKK Mûrat Karayilan ke tewrê bernameyekê taybet yê  Radyoya Dengê Kurdistan bi seba wayîr vejyayîşê dewa Xerabê Bava veng da.  Karayilan’î va, seba Xerabê Bava çi destê ma ra yeno, ganî ma eyî bikerê. 

Karayilan’î vist vîrî ke dewa  Xerabê Bava de komkişten û zilm esto; do meşt dewekê bîn de biqewimîyo û aşkere kerd ke şarê kurd ganî hemverê na zilmî de bêveng nêmano; wayîrê ci bivejyo. 

Endamê Komîteya Rayverîn ê PKK Mûrat Karayilan’î vist vîrî ke Xerabê Bava de ser cuya mordeman de talokeyekê gird esto û wina va: “Dew bi temamî hêsîr ameya girewten. Însanî zerreyê keyeyê xo de hepiskerdîye. Nêşkenê bivejyê teber û heywananê xo rê yem zî bidî. Nîno zonayen ke heta nika çend kes merdîye, çiqe zerar dayê. Çîyo ke yeno zonayen no yo; meydanê dew de îşkenceyê însanan kerdîye û tayî şehadetî estê. Yanî no ca de na seserr de wehşetekê gird esta. Rewşa tîya zey yê Cizîr a diyîn a. Karayilan’î veng da herkesî ke desince seba Xerabê Bava bikewê hereket û wayîrê ci bivejyê.  


MÊRDÎN