Serekê Pêroyî yê DÎSKî Kanî Bekoyî derheqê mîtîngê 1ê Gulane ke şert û mercê OHALî de ameyî viraştiş de wina va: “Karker û şarî 1ê Gulane de bi çalakîyan vera polîtîkayanê dagîrkerî û şerî de vatî êdî bes o” 

Bajarê herême û Tirkîya de bi mîlyonan kesî 1ê Gulane Roja Kede, Piştîdayîş û Têkoşînî de vejîyayî raşteyan û vera polîtîkayanê ekonomî û kede yê îqtîdarî de vengê xo berz kerdî. Sere de Stenbol, Anqara, Antalya, Îzmîr, Amed û sewbîna cayan de karkerî mîtîngî viraştî û hem roja xo pîroz kerdî û hem zî hêrs û reaksîyonê xo nîşan dayî. Babete ser o Serekê Pêroyî yê Konfederasyonê Sendîkayê Kedkaranê Şorişgeran (DÎSK) Kanî Bekoyî qisey kerd û vînayîşê xo ard ziwan. 

Bekoyî qiseykerdişê xo de dîyar kerd ke rasteyê mîtîngan ke hetê bi mîlyonan kesan ra ameybî pirrkerdiş, ê cayan de polîtîkayanê şer û dagîrkerîya kede rê ‘êdî bes o’ ame vatiş. 


‘Hinî bes o, wa şer biqedîyo û biratî bêro’

Bekoyî qiseykerdişê xo wina domna: “Her çiqas ke mîtîngî şert û mercê OHALî de ameyî viraştiş zî, sere de Bakirkoy û zaf cayanê Tirkîya de bi hawayo bicoş 1ê Gulane ame pîrozkerdiş. Şarî vera şer û dagîrkerî de vengê xo berz kerd. Her çiqas ke bi hezaran kesî bi Qerarnameyê Hukmê Qanûnî (KHK) karê xo ra ameybî eştiş, reyna zî rasteyî pirr bîyî. Karkeran rasteyan de vatî; êdî bes o, wa şer biqedîyo û biratî bêro.”


Tabuyê welatî waşt

Bekoyî dewamê qiseykerdişê xo de dîyar kerd ke ‘her ke şono betalî, taşeronbîyayîş û karkerîya kîratî zêde beno’ û wina domna: “Karkeran nînan ra va ‘bivindere’. Yê ke tapuyê welatî waştî, vera înan de 25 mîlyon kesan reya Nê xebetna. Nika nê hema nêqedîyayo û nika ra pey zî do bidomîyo. Referandûm şert û mercê ke qayûm tayînê şaredarîyan bîyî, rojnamegerî tewqîf bîyî û televîzyonî padîyayî de ame viraştiş. Hemserekê partîyêka 6 mîlyon reyî girewtî û 11 parlamenterî zîndan de yî. Nê şert û mercan de daxî cewabêko gird ameyo dayîş. Taksîm seba ma pîroz o û ma waştişê xo ra fek veranêdayo. Sey Denîz Gezmîşî, keso ke vera emperyalîzmî de teslîm nêbîyo, rayber û egîdê ma yê winasî estî.” 


Ganî ma xelq bikerî

Bekoyî peynîya qiseykerdişê xo de bale ant karkeranê domanan ser û qiseykerdişê xo wina qedêna: “Goreyê daneyê TUÎKî 2 mîlyon domanî 15 serreyî ra şenik î û yenî xebetnayîş. Nika 300 buroyê taybetî yê îstîhdamî ameyî akerdiş û prosesê vernîya ma de do nizdîyê 6 mîlyon û nîme karkerê kîratî do ewja de ca bigirî. Ma do hêzo ke karker û kedkaran ra girewto reyde têkoşînê xo bidomnî. Nika deynê ma yê aştî esto û ma do hewl bidî sozê xo bîyarî ca.” 


 DÎHABER/STENBOL