Zarawaya Kirdaskîye de na hawa yew perse çin o.
Tim karo nêmcet înan de tîpa ‘e’ reyde qedîyeno. Mesela; Navê wê Zelal e. Karê min awansazî ye. La kirmanckîye de goreyê zayendî karo nêmcet bedilîyeno.
Û kar goreyê kerdoxî nê, goreyê kareserî nusîyeno û reyna zayendî goreyê kareserî xo kifş kena. Kareser zî ganî name û kareser bo, eke name nêbo goreyê kareserê nê, goreyê kerdoxî kar teşne gêno.
Fînak:
1.Emser serra pêrodayîşî ya. (raşt o.)
2. Emser serra pêrodayîşî yo. (xelet o.)
Ewta de ristaya yewine raşt a. Emser çekuyêka nerî ya û serre zî çekuyêka makî ya. La kar goreyê emserî yanî kerdoxî nê, goreyê serre yanî kareserî(obje) teşne girewto.
Ma na babete ser ro zaf fînakî bidê ke weş fehm biba.
a.Vernîya ma zimistan o. (raşt)
b. Vernîya ma zimistan a. (xelet/şaş)
a.Gureyê min citêrî ya. (raşt)
b. Gureyê min citêrî yo. (xelet/şaş)
a.Arayîya min penîr û zeytin o. (raşt)
b. Arayîya min penîr û zeytîn a. (xelet/şaş)
a. Cayêko weş û tarîxî Parka Gulxane ya. (raşt)
b. Cayêko weş û tarîxî Parka Gulxane yo. (xelet/)
a. Sêwregi(makî) şaristanêko zaf weş o. (raşt)
b. Sewregi şaristanêko zaf weş a. (xelet/şaş)
a.Qesra Îshaq Paşayî Bazîdî de yo. (raşt)
b. Qesra Îshaq Paşayî Bazîdî de ya. (xelet/şaş)
a. Bara Hesenê Ehmedî rez o. (raşt)
b. Bara Hesenê Ehmedî rez a. (xelet/şaş)
a. Vatişê to xirabîya to ya. (raşt)
b. Vatişê to xirabîya to yo. (xelet/şaş)
a. Nameyê to Xezal a. (raşt)
b. Nameyê to Xezal o. (xelet/şaş)
a. Elî manga ya. (raşt)
b. Elî manga yo. (xelet/şaş)
a. Gulike ga yo. (raşt)
b. Gulike ga ya. (xelet/şaş)
a.Karê ma xebata Dimilkîye ser ro ya. (raşt)
b. Karê ma xebata Dimilkîye ser ro yo. (xelet/şaş)
a. Têşaneyî(têşanî) merg o. (raşt)
b.Têşaneyî merg a. (xelet/şaş)
Cor de zî aseno kar goreyê kareserî nusîyeno û kareser zî tesil name bo. Eke name nêbo se benoş Biyerî ma nînan ser ro bivinderî.
a.Linga min çewt a. b. şewa min tarî ya. c. Banê min diqat o. d. Keyeyê min verên o.
e.Hollanda(makî) hetê birrî(daristan) ra zaf zaf weş a. f. Kila adirî gur a. g.Koyê Sîpanî berz o.
Nê fînakê corênan de zî kifş o ke eke karê nêmcetî de kareser yan zî name çini bo o, zerf bibo o wext kar goreyê kerdoxî nusîyeno.
Zerweş Esnaw