Rêxistina banî yê kurdanê Awrûpa KCDK-E beyan kerd ke Awrûpa de serva serbestîya Rayverê Şarê Kurd Abdullah Ocalan’î kewnê hereket û rêzeçalekîyan virazenê. KCDK-E veng da pêrokîn Kurdistanijan û dostanê ci ke bi rihê seferberî tewrê nûmayişan bibê.
Kongreyê Civaka Demokratîk yê Kurd ê Awrûpa (KCDK-E) eve damûstayîneke plansazeya xo ya nûmayişan aşkere kerd. Damûstayîn de hayr ancîya konseptê herbê qilerîn yê AKP ra pîya tecrîdê vera Rayverê Şarê Kurd Abdullah Ocalan’î ser zî. KCDK-E 19ê na aşm ra tepya startê nûmayişanê nobed, rayşîyayiş, mitîng, ronayenê standê enformasyon û kampanyaya îmzeyan dana.
Wextê serbestîya Ocalan’î amê
KCDK-E aşkere kerd ke şarê kurd do no dûştê na rewşî bêveng nêmano û wina dewam kerd: “Dewleta tirk rind zana ke wexto ke babed weşîya Ocalan’î bo, kurdî kamcî rîskan gênê ver çiman. Merhaleya ameyîn de tenya ewleyîya Ocalan’î nê, gerek azadîya ci virazîyo. Ma kurdê ke Awrûpa de ciwiyenê bawer kenê ke wextê serbestîya Ocalan’î amê. Neyra tepya hedefê ma tenya serbestîya Rayverê ma ya û ma dê serva nayî bigurweyê.”
Nûmayişa nobed bena hera
KCDK-E da zonayen ke nûmayişa ‘Nobeda Ocalan’î rê Azadî’ ke sûka Fransa Strasbourg de ver bana Konseya Awrûpa, Parlamentoyê Awrûpa û CPT de ramena do 4. serragêra ci de hera bo. Mavêna 19 û 26ê Hezîran de sazgehê kurd û dostanê ci dê nobed bigîrê. Hemserokê Navendê Civaka Demokratîk yê Awrûpa ra pîya temsîlkarê sazgehan, sîyasetmedar, roşnbîr û hunermendî dê tewrê na nûmayiş bibê.
Standê enformasyon ronîyenê
Goreyê damûstayîn çarçoveyê rêzeçalakîyan de xêlê cayan de standê enformasyon ronîyenê. Standê ke mavêna 20-30ê Hezîran de sûkanê zey Koln, Dusseldorf, Dortmûnd, Hannover, Hambûrg, Bremen, Berlîn, Frankfûrt, Stûttgart, Munîh, Nurnberg, Mannheîm, Bern, Bassel, Zurîch, Cenevre, Marsîlya, Lyon, Parîs, Roma, Japonya, Bruksel, Amsterdam, Den Haag, Stockholm, Oslo, Helsînkî, Kanada, Avusturalya û Kopenhaag ronîyenê de do hayr biancîyo tecrîdê vera Ocalan’î, polîtîkayanê qetlîam ke hetê AKP Kurdistan de yenê ramiten ser.
‘Mebe pîyakarê sûcî’
Plansazeya Kongreyê Civaka Demokratîk yê Kurd ê Awrûpa de rayşîyayiş û mitîngî zî estê. Mavêna 1 û 15ê Temûz de pêrokîn welatanê Awrûpa de her roj seatanê şan de rayşîyayiş û mitîngî virazîyenê. Mavêna 15ê Temûz û 15ê Tebax de kî her peynîya hefte rayşîyayişê girsî yê navendî dê bîrê organîzekerden.
Heto bîn ra HDK-A zî do destpa kampanyaya ‘Mebe pîyakarê sûcî’ bikero. Çarçoveyê na kampanya de do Almanya de îmzeyî bîrê are kerdin û teslîmê sazgehanê eleqedar bibê. Peynîya damûstayîn de KCDK-E veng da şarê Kurd, çormeyanê şoreşger û demokrat ke serva ameyîna azadîya şaran bi rihê seferberîn tewrê nûmayişan bibê.
ANF/BRUKSEL