Hevserokînê Konseyê Rayverîn ê KCK’î derheqê Çewlig de kiştenê wezîfedarê HDP Hamdullah Oge de damûsnayinê da û nêrazîbiyayin mûsna. KCK’î cînayet zey karê kontrayanê JÎTEM hesibina û vat ki, peyniyê heme êrişanê vera HDP de, hukumetê AKP esto.
KCK’î vist vîrî ki êrişê Çewlig de badê qisanê Serokkomarê tirk Tayîp Erdogan’î, ki HDP hedef mûsnabi ameyo û wina vat:” Kontrayê Farqîn û Licê de êriş kerd, Çewlig de jî êrişê wesaîta weçînayin ê HDP kerd. Eno êriş badê qisanê Erdogan’î ê Çewlig de ame. Tayîp Erdogan û rayverê AKP her qisanê xo de, HDP hedef mûsnenê. Enê vatenî, qandê kontra û quwetê xorî ê AKP benê ferman. Rojo ki, qandê mîtîngê Erdogan’î, tedbîrê hera girotiyayê, kiştenê wezîfedarê HDP, mûsneno ki, wezîfedarê HDP, binê kontrolê dewlet de kişiyayo.”
KCK’î vist vîrî ki wextê xebatanê weçînayini de vera HDP her roj êrişê viraziyenê û wina dewam kerd:” Cayo ki, wextê weçînayinan de, vera jû partî her roj êrişê viraziyenê, wija hukumetî meşrûbiyayişê xo kerdo vinî. Xora AKP’ijê her fina fam kenê, iyê kenê vinî, êrişan kenê vêşî. Qandê 70 parlementeran bê heq bi dest bifînê, wazenê HDP binê bendê weçînayinî de biternê.”
‘Cewabê en rast, vêşîkerdinê rayanê HDP yo‘
Hevserokînê Konseyê Rayverîn vera êrişkarîn û plananê lîmin ê AKP wina veng da heme kurdistanij û çoşmanê demokratîk: “Gerek heme kurd û çoşmeyê demokratî û merdimê wayirê vîjdanî, rastînê êrişkarînê AKP bivînê. Bi vêşîkerdinê wayir-vejiyayinê HDP, ceza bidê AKP. Çewlig de jî, Amed de jî, Mûş de jî û heme cayanê Kurdistan û Tirkiye de jî, cewabê en rast, vêşîkerdinê rayanê HDP yo. Gerek heme kurd û quwetê demokratîkî vera êrişan, wayirê HDP vejiyê. Binê banê HDP de, hetkarîn û jûwîna quwetanê demokratîk bi quwet bikirê.”
KCK’î keyeyê Hamdullah Oge û heme kurdistanijan rê serweşîni wast û vat: Ma soz danê, mayê wastenê şehîdan bi Kurdistanê Azad û Tirkiyeya demokratîk biyarê ca.
ANF/BEHDÎNAN