KCK dewleta tirk ra wast ki, peyniyê siyasetê înkarî biyaro û qirkerdin nas bikiro.
Hevserokînê Konseyê Rayverîn ê KCK’î qurbanê qirkerdinê ermeniyan ardî vîrî û wast ki peyniyê siyasetê înkarî biyariyo.
KCK vist vîrî ki şarê ermenî sera 1915 de rastê komkiştenê gird ameyê û vat:
“Enê komkiştenan de, nezdiyê mîlyon û nîm ermeniyan weşînê xo kerd vinî. Qandê kişten ermenîbiyayin qîm kerdê. Kesê ki komkiştenan ra weş xelisiyay, mecbûr kerdî ca û warê xo terk bikirê. Bi enê komkiştenan waziya, jû şar û bawerî werte ra hewadê. Eynî wext de, vera asûrî-suryaniyan jî qirkerdin viraziya. Sicîlê qirkerdin ê dewleta Osmanî û Tirk a vera şaran û baweriyan bol lîmino. Dersim de jî, vera kurdan qirkerdin viraşto. Xeylê komkişten û hewldanê qirkerdinê bînî jî estê, la belê hewna nêvejiyayê werte. Hesabê înan jî pers nêbiyo.”
‘Cewab bidê serraçarnayinê 100. ê qirkerdini’
KCK vat ki, her çiqas qirkerdin sera 100 serî ravêrdê jî, hewna dewleta tirk qirkerdinê ermeniyan înkar kena û wina vat: “Zîhniyetê înkarî jî, hendê qirkerdin talukeyo. Qandê hurmetê rastînê tarîxi, gerek zîhniyetê înkarî viradiyo. Mesele mabenê ermeniyan û dewlet tirk de na. Çareseriya mesele jî, gerek goreyê rastînê tarîx viraziyo. Qandê cuyayişê demokratîk, azad û zeypêyin ê şaran, çiyê winayin mecbûriyeto.”
KCK ard ziwan ki, ê zey Hereketê Azadiyê Kurd, sernî ra hetanî nika, hertim şaranê bindest û heme baweriyan het ca genê û azadiyê înan jî, zey azadiyê şarê kurd vînenê.
KCK eleqe ant ermeniyê Kurdistan û Tirkiye jî ser û înan ra wast ki, Hereketê Jûwînê Demokratîk ê Ermniyan ronê û winî cewab bidê serraçarnayinê 100. ê qirkerdini.
ANF/BEHDîNAN