Koçberê ke şerî ver bajarê xo ra koçê xeylê bajaranê Tirkîya kerdî, hetê karsazan ra yenê pelçiqnayîş. Koçberî Hatay, Dîlok û Riha ra koçê Tirkîya kenî. Koçberê ke koçî kerdî şerê cuye danî û şert û mercê xeylê giranan de xebetîyenî. Nê bajaran ra yewe zî Antalya ya. Koçberê Antalya hamnanî hêgayan de, zimistanî zî merkezê bajaran de xebetîyenî. Heqê karkerê domanî zî xeylê tay yeno dayîş.
Rojêk de 50 TL heq dîyeno
Kesê ke koçê qezayê Serîk, Alanya, Kumluca û Aksuyê Antalya kerdî, bê sîgorta yenê xebetnayîş û rojêk de 50 TL heq dîyeno înan. Cayê mendiş û rakewtişê koçberan xirab o û pakîye ver nêweş kewenî. Koçberê hêgayan çadir û odeyan de manenî û seba odeyêk 700 TL ya zî 1000 TL kîra danî. Odayêk de 15-20 koçberî manenî. Domanê ke xebetîyenî zî heqê xo yê perwerdeyî ra mehrûm manenî û 5 TL yan zî 10 TL heq dîyeno înan. Babete ser o koçber û xebatkarê hêgayan qisey kerdî.
Seba ma Sûrîye û Tirkîya eynî yî
Adnan Muhammedo ke bi keyeyê xo bajarê Hama ra ameyo Antalya, wina va: “Nizdîyê serrêkî yo ma tîya de xebetîyenî. Rewşa ma ya verê cû zî na rewşe ra başêr nêbîye. Şert û mercê cuya ma qet nêbedilîya. Eke ma ewja de bimendênê, ma do bimerdênê. Merg hetê feqîran de yo. Cok ra ma ameyî Tirkîya. Ma xo mergî ra pawenî. Seba ma Sûrîye û Tirkîya eynî yî. Ma tîya de zî mîyanê feqîrî de yî.”
DÎHABER/ANTALYA