Merdim yew çîyek de zorî ancen o. O çîyek zî ser şehîd nuştiş o.  Ez çend rojîya vana ser hevala ma rojnameger Şehîd Denîz binusnê. La her dem giranî kewna ser mi. Mi xo ra vatêne  eceba ez heq de bivejî ya nêvejî. Merasîma cenazê Şehîd Denîz ya Şehîdxanê Mehmet Karasungur de bîbî mi taqîp kerd. O rojî re nat giranî ke kewta ser mi.
Her roj ez nata şêne, weta şêne mi vatêne ez gera xo bin nê barê re xelasbikerê.
Gera ez deyndariya xo bîyarî ca. Na deyndarîya şehîdana. Na deyndarîya hevala ma rojnameger Şehîd Denîza. Eger ma ewro na deyndariya xo nîyari ca, la kam hew roj anî ca. Na deyndarî de di çîyê esasî estî. A yewîn herinde şehîdan girewtişa.
A diyîn zî raştiya şehîdan Şarê Kurd ra bidêne şinasnayîşê. Ez wazena wezîfê diyîn re destpêbikî. Ez Şehîd Denîz 2007 ra nat şinasnena.
Şehîd Denîz zaf hevalek xozayî yanî tabîiyîbî. Teber ra seyî asanê zere xo de zî hina bî.
Hetê hetkarî de çi yardim hewce bikerêne, Hevala Şehîd Denîz ca de amadebî.
Qet nê vatêne ne. Çiqas wextê ayê bibenê seba hevalê xo yardim kerdenê.
Zê vayê gîtê resêne hevalê xo. Tu vatêne na kêna qet ters nêşinasnena.  Tim û tim huyêne. Mi qet û qet nêdî ke Hevala Denîz xemdara. Însanê ke yew hew Hevala Denîz ra qiseybikerdenê, bin bandorê ayê de mendenê. Însanê ke Hevala Denîz ra ecîz bîyo mi rîye erdî de nêdîyo.  Hevala Denîz hevala ke hinabî.
Mi wexto ke merasîma cenazê Hevala Denîz taqîpkerd, mi dî ke bi seyan gerîlla amêbî Şehîdxanê Mehmet Karasungur. Şarê çar parçe Kurdistanê zî amêbi. Ez ewnêne çimanê gerîlla mi çimanê înan de di çîyî dî. A yewîn giredanîya gerîlla ya Şehîd Denîz ra.
A diyîn zî qisas girewtişê. Zobî zî wexto ke dayîya(mayê) Şehîd Denîz qiseykerd, zaf tesîrêk gird kerd. Dayê Sultan hina va, “25 serrîya ma gerîlla ra yê. Ma zaf zorî û zehmetî ant. La ma rojek tepîya ra gam nêeşt. Ma tiya ra pê zî kuvvet danî şar û gerîllayê xo. Wa dost û dişmen zî bizanê. Ma xoverdanî”. Şarê Kurd hem wayîre Şehîd Denîz vejîya hem zî wayîre vatişê Dayî Şehîd Denîz vejîya. Bi sey laser Qendîl ra heta Zaxo, Zaxo ra heta Sîlopî, Sîlopî ra heta Amed, Amed ra heta Wan, uca ra zî heta Çildêran(Ebax) wiştê ra ser lingan. Şarê ma wezîfe xo ard ca û ano ca.
Ma zî sond wenêne ke, ma herinde Şehîd Denîz veng nêverdêne.