RENGÎN AZÎZOGLU / JINNEWS / AMED
Xeberê zext, teda û îşkenceyan zîndanan ra kêmî nêbenî. Nê zîndanan ra yew zî Zîndanê Tîpa Tyî yê Şakranî yo û no zîndan de neheqîyî dewam kenî. No zîndano ke xeylê reyan muameleyo xirab reyde ame rojeve de nika zî cil, kitab û sewbîna ke hetê keyeyan ra yenî ardene, nêgirîyenî zere.
Mudirê zîndanî şertê ‘ganî çîyo ke yeno ardene newe bo’ ronayo û no semed ra keyeyî zehmetî cuyenî. 3 heqê pêvînayîşî yê hepsîyan zî bica nîno ardene. Reyna wexto ke hepsîyî seba wedarnayîşê tecrîdê serê Rayberê Şarê Kurdî Abdullah Ocalanî kewtî girevê vêşanîye, çalakgêrê ke zîndanê Şakranî de kewtbî grev, nêerşawîyayî nêweşxaneyî. Îdareyê zîndanî ge-ge hepsîyan derb kerd û nêerşawit nêweşxane.
Melumatê ke keyeyanê hepsîyan ra yenî girewtene gore OHAL qet no zîndan de nêameyo wedarnayene. Hepsîyî her roje raştê nê kerdişan yenî û destûr nêdîyeno ke hepsîyî bivejyî kitabxane, spor û sînema. Mektûbê ke şonî, nêdîyenî hepsîyan. Reyna sehnayîşê koguşan zaf zêde bîyo. Kovarê sey Demokratîk Modernîte û Jineolojî ke teber de yenî peydakerdene, nêgirîyenî zîndan. Rojnameyê Yenî Yaşamî zî aşma Sibate ra dima nêdîyayo hepsîyan. Wextê pêvînayîşan de hûmara gardîyanan 2 qatê keye û hepsîyan o.
Wazenî Zîndanê Amedî yo bîn awan bikerî
Keyeyî dîyar kenî ke kerdişê 12ê Êlule ewro Zîndanê Şakranî de benî û danî zanayene ke nê kerdişan ra mudire Meltem B. berpirsîyar a. Keyeyan ard ziwan ke zafaneyê nê kerdişan ameyîşê mudire ra dima bîyî. Keyeyan wina domna: “Mudire dest ser kitabanê Kurdîyan nana. Tîya de kerdişê ‘Tirkî qisey bike, zaf qisey bike’ hîna zî no zîndan de esto. Wazenî Esat Oktay û Zîdanê Amedî yo bîn awan bikerî. Tecrîdo ke hetê Wezîrîye ra ameyo wedarnayene, Şakran de yeno domnayene. Îtîrazê hepsîyan ver înan rê tehqîqat abeno.”