Babete ser o Fermandarê Asayîşê Heynîda Ekîd Tahîrî va çeteyê çendêk ra ver hêriş kerdî û dima ra zî pêrodayîş qewimîya. Pêrodayîş de yew çeteyî bombeyê ke xo ser de teqnayî. Tîya ra dima çeteyî no rey Taxa 1ê Hezîrane de hêriş kerdî. Hêzê asayîş û pêşmergeyan zî sey teqvîye sewqe taxe bîyî. Heto bîn ra yeno vatiş ke tayê çeteyê ke taxan de xo nimitbî, dest bi hêrişî kerdî.
‘Ma bi helîkopterê tirkan ameyî Kerkûk’
Goreyê sîteya xeberan yê Bedîr Newsî, yew çeteyê DAIŞî ke pêrodayîşî de hewayo sax ame tepiştiş va: “Ma bi helîkopterê ke yê dewleta tirkan ameyî dewa Serêtepe ya ke girêdayê Kerkûkî ya. Ma ûca ra vîyartî merkezê bajarî. Hedefê ma girewtişê walîtîye û dezgehê dewlete yê fermî bî. Nê semedî ra ma hêrişê nê cayan kerd.”
Yeno zanayîş ke no şewdir çeteyê hêrişê na dewe kerdîbî û dima ra pêrodayîş vejîyabî. Netîceyê pêrodayîşî de 9 çeteyî ameybî kiştiş.
Hemdanîye xelesnîya
Operasyonê xelesnayişê Mûsil roja 8. de rameno. Vizêr çarçoveyê hemle de bakûrê Mûsil de qezaya Hemdanîye pirodayişan ra dima çeteyan ra xelesnîya. Herzewbîn raya mavêna Başîka û Mûsil zî girotîya bin qontrolî.
Quwetê peymerge ke cepheyê Başîka ra operasyonî ramenê 10 kîlometre bakûrrojhelatê Mûsil de yê. Herzewbîn artêşa Iraq zî vakûrê Gîyare de 10 kîlometre avey şî. Çarçoveyê operasyonê artêşa Iraq de qezaya Hemdanîye çeteyan ra amê xelesnayen û lejkeranê artêş qontrolê qeza girot dest. Hedefê artêş de dewa Şore esta. Herzewbîn teyareyê lej yê quwetanê koalîsyonî zî meterîsanê DAIŞ bombevornayen kerdî. Goreyê îdiayan bombevornayenê başûrê Mûsil Tilsiqufî de yardimkarê Ebûbekîr El Bagdadî Ebû Ûsame ra pîya xêlê çeteyî amey kiştiş.
Heto bîn ra Wezîrê Pawiten yê Amerîka Ashton Carter, zîyaretê Enqera û Bagdat ra dima ravêrd Hewlêr. Yeno pawiten ke pêdiyayişê Carter û sermîyananê Herêma Kurdistan de operasyonê xelesnayişê Mûsil bîro munaqaşe kerdiş.
KERKÛK / MÛSIL