Bajarê Kerkûkî yê Başûrê Kurdîstanî de pêsero teqayîşî bîyî. Goreyê melumato ke hetê Mûdirîya Polîsan ya Kerkûkî ra ame dayene 5 teqayîşî bîyî û nînan ra 3ê ci merkezê Şîîyan de, 2ê ci zî Cadeyê Bagdatî de bîyî.
Ame musayene ke 3 teqayîşî netîceyê bombeyê ke ameyî bicakerdene, yê bînî zî netîceyê teqayîşê wesayîtê bombebarkerdeyan de bîyî. Teqayîşan ra dima polîsanê herême û artêşa Îraqî herême de tedbîrê ewleyîye girewtî û xeylê ambûlansî neqlê cayê hedîseyî bîyî. Netîceyê teqayîşan de ame vatene ke 5 kesî merdî û 18 zî birîndar î. Labelê derheqê hûmara merde û birîndaran de melumatêko zelal çin o.
Goreyê çimeyanê herêmî, 6 teqayîşî bîyî û goreyê nê çimeyan nê teqayîşan ra 4ê ci merkezê Şîîyan de, 2ê ci zî Cadeyê Bagdatî de bîyî. Yeno vatene ke teqayîşan ra dima qezayanê Daqoq û Dibizî de pêrodayîşî qewimîyayî.
KERKÛK