Qezaya Sûrî ya tarîxî ya Amedî de rijnayîş dewam keno; makîneyê karî bêmaben banan rijnenî. Heto bîn ra Taxa Benusenî ya ke teberê Sûrî de ya, ewja de zî talan esto. Kerrayê ke serê suran ra ginenî war û taxijî tersenî ke bin ra derbaz bibî.
Derheqê nê kerrayan de malumat dîyayo selahîyetdaran, labelê heta nika ti kes çîyêk nêkerdo. Heto bîn ra tayê kesî nê kewtişê kerrayan sey firsend vînenî û nê kerrayan tirawenî. Babete ser o taxijî qisey kerdî.
Taxijan ra Mevlude Yamane qisey kerde û wina va: “Ma seba ke maydanosêk daxî bigîrî, bi kîlometreyan rayîr meşîyenî. Eke nêweşêkê ma bibo ma do senî bîşêrî nêweşxane. Ganî selahîyetdarî seba kerrayê ke bircan ra kewenî war, tedbîran bigîrî.
Ma zehmetî ancenî
Salîh Açilmako ke 30 serrî yo ke taxe de ronîşeno, wina va: “Seba ke wesayîtî nêşênî bikewî taxe, ma heme çîyê xo pişta xo de kirişenî. Cok ra ma bi desan cayan de mola danî. Tayî kesî yenî nê kerrayê ke kewenî war, arê danî û benî roşenî. Yan zî benî dewe de pê keye virazenî. Ganî vera nê kesan de tedbîrî bêrî girewtiş.”
DÎHABER/AMED