Kedkarê perwerdeyî yê ke bi Qerarnameyê Hukmê Qanûnî (KHK) ameybî îxraçkerdiş seba beşdarbîyayîşê 1ê Gulane veng dayî heme karker û kedkaran. Edene de KESK, DÎSK, TMMOB, TTB û Baroya Edene amadekarîya pîrozkerdişê 1ê Gulane kenî. Kesê ke çalakîya pîrozkerdişî de ca bigîrî do Tîyatroya Akerde ya Mîmar Sînanî ver de kom bibî heta Taxa Ugurî bimeşyî. Meşîyayîşî ra dima zî do mîtîng bêro viraştiş.
Babete ser o Endamê Egîtîm Senî û Hemserekê Komeleya Elewîyê Demokratîk yê Şubeya Edene (DAD) Zeynel Kete û Serekê Egîtîm Senî yê Şubeya Edene û Serekê Komîteya Amadekarî Ahmet Karagozî qisey kerdî.
Bi têkoşîn ame qezenckerdiş
Keteyî qiseykerdişê xo de va ‘ma seba pîrozkerdişî roja dişeme do taxa 1ê Gulane de bibî’ û wina dewam kerd: “Ma bi têkoşînê serran ameyî roja ma ya ewroyêne. Ma seba aştî, azadî, ilm, laîkî û ziwanê dayîke ameyî îxraçkerdiş. Seba azadîya kede û wayîrvejîyayîşê erjan ma do bi ruhê Newroze 1ê Gulane pîroz bikerî.”
Karagozî zî destpêkê qiseykerdişê xo de seba beşdarbîyayîşê pîrozkerdişî veng da û qiseykerdişê xo wina qedêna: “Emser pîrozkerdişê 1ê Gulane xeylê muhîm o. Ma do bi 1ê Gulane pelçiqnayîşê şer û faşîzmî rê vajî nê.”
DÎHABER/EDENE