Namzedê Serekkomarîye yê HDPyî Selahattîn Demîrtaşo ke Zîndanê Edîrne de tewqîfkerde yo û kampanyaya xo zîndan ra domna, derheqê netîceyê weçînayîşî de ser hesabê xo yê Twîtterî ra îzehetêk da.
Demîrtaşî îzehetê xo de dîyar kerdo ke wa netîceyê weçînayîşî seba herkesî xêrin bo û wina vato: “Ez welatîyê ke raya xo dayî pîroz kena û embazê xo yê şert û mercê OHALî de fedakarîye kerdî rê sipasîyê xo kena. Ez partîya xo zî pîroz kena û îradeya şarî ke dormeyê HDPyî de bîye yewe silam kena. Nê şert û mercan de meclîs de bîyayîşê HDPyî serkewtişêko gird o.”
Demîrtaşî dewamê îzehetê xo de wina vato: “Bawerîya şarê ma ya sîyasetê demokratîke rê, seba têkoşîndayîşê ma talîmatêk a. Ma do zere û teberê meclîsî de bi hawayo qerardarî têkoşînê xo bidomnî. Ez embazê mi yê weçînîyayî û nêweçînîyayî pîroz kena û hemînan rê serkewtiş wazena. Ez bitaybetî ciwan û cinîyan rê sipasîyê xo kena. Namzedê bînî 100 mîtîngî viraştî, mi ancax 100 mesajî weşênayî. Ma do pêro pîya netîceyê weçînayîşî bi hawayêko baş analîz bikerî. Ez şima hemînan rê selam û rêzê xo erşawena û şima rê serkewtiş wazena.”
MA /AMED