Fermandarê Meclîsê Leşkerî yê Serêkanîyê Îmad Meno yo ke cepheyê şerî de bi, derheqê xoverdayîşî de ajansê ANF rê qisey kerd û dîyar kerd ke keyeyêk zî Serêkanîyê de nêkewto destê dişmenî.
Menoyî va ‘hêrişê dişmenî çend giran zî bibê, no şar qet do sereyê xo verê dagîrkeran nêdo war’ û wina dewam kerd: “Şar do seba rûmetê xo heta peynîye şer bikero. Hêrişî zaf giran ê la hêzê ma, şervanê ma, şarê ma vera înan de xoverdayîşêko gird nîşan dano. Xoverdayîşêko bêhempa yeno dayene.”
Menoyî va ‘artêşa Tirkî ya dagîrkere û çeteyê aye wazenê dormeyê Serêkanîyê bigirê’ û wina domna: “Wazenê dormeyê bajarî bigirê. Labelê ma vera nê hêzan de şer kenê, xover danê. Heta nika keyeyêk zî nêkewto destê înan. Rojhelat û rojawanî ra wazenê xetêk bivirazê û dormeyê bajarî bigirê. No ca wareyê şerî yo.”
Ma do heta çilka peyêne şer bikerê
Menoyî dewamê qiseykerdişê xo de da zanayene ke hêzanê înan şewe ra çalakîyê bitesîrî viraştî û wina va: “Hem xeta Til Xelefî de û hem zî xeta Mezrî de çalakîyê bitesîrî ameyî viraştene. Bi desan dagîrkerî ameyî kiştene. Bi panzeran merdeyanê xo kirişenê. Hêzê ma xover danê, şewa bîne ra yo ma operasyonan virazenî û nika şer giran o. Ma sozêk dabi şarê xo, ma do heta çilka peyêne ya gonîya xo seba rûmetê xo şer bikerê.”
SERÊKANÎYÊ