Hikûmet roja ke amê îxtidar ra heta na roj çêkûyê ‘demokrasî’ ‘birabiyîn’ ‘haştî’ fekê xo ra nêvirada. Her firset de nê vatişan ana ziwan û hewl dana ke hometî-civakî bixapîno. La pratîk de zî rojane dîktatorî, faşîzm, komplo, zûrrî, tiriten ra fek nêviradana. Nika zî çêkû-qiseya ‘çarekerdin’ kena germ û germ ana verê homet. Wextê do derg o behsê ‘muzakere’ ‘çarekerdinê demokratîk’ ‘paketê reform’ ‘xerîteya ray’ kena. La yê ke rojane polîtîkayanê AKP taqîp kenê şenê bivînê ke AKP senî çerq kena, xo ebi xo ra kewna nakokey.
Winî ayseno ke niyetê AKP yê çarekerdinê meseleya Kurd çinyo. Xerîteya ray a ke ne erd ne zî asmenan de ci rê ca nêvînena veng-tol a. Xerîteya ray û paketê reform yê ke behsê ci yeno kerdin de tesfiyekerdişê hereketê serbestî yê Kurdan esto. Nika onca-fina jû paketa bîn ya newî bin nameyê ‘qanûnê tîvariyê’ kenê hadre. Ebi na qanûn ra piya endî polîsê AKP kêfê ci çiwext biwazo şenê jew kesî bikişê, pirodê, bitepşê, hiqûqê xo zî goreyê nay kenê hadre. Hikûmet ebi nê hewldayenan tirkiye açarnena dewletê da polîs, dewletê da mîlîtarîst û faşîst. Nê paketî, qanûnî û hewldayenî dê serrê AKP de bibê bela û peyniya AKP biyarê. Çi ke endî homet-civak zey wextanê verrî ver derbeyanê eskerî, ver terorê dewlet xo nimz nêkeno, do heqanê xo bigeyro.
Meseleya Kurd de zî hikûmet no siyasetê xo yê qilerîn-leyminî şixûlnena. Jû hetî ra behsa diyalog-muzakerey kena, heta bîn ra roj bi roj terorê binçimkerdin-girotiş ramena. Him vana ez meseleya Kurd çareser kena him zî vana PKK zey DAIŞ rêxistinê da terorîsta û seba tesfiyekerdişê PKK desteg dana çeteyanê barbar yê DAIŞ. Him vana wa PKK tifing virado, la heta bîn ra ser Kurdan teror ramena. Vano ‘ey Kurdî bêrê serreyê xo derg bikerê ez zey miya qurbanî serreyê şima cikera”. Niyet û hedef wina zelal o; tesfiyekerdiş, kolekerdiş û peynîardişê Kurdê azad o.
Paketê çarekerdişê meseleya Kurd yê AKP de ne heqê perwerdeyê ziwan yê Kurd, ne heqê îdareyê xoser, ne heqê kamî, ne yê kiltûrî, ne sosyal, ne zî heqê siyasî estê. Xora qanûna bingeyîn de ne garantîkerdişê kamiya Kurd re behs yeno kerdin, ne zî niyetê do wina-niya esto. Hewna tehamilê hikûmet nûmayişanê demokratîk û rewa yê hometî ra çinyo ke, serva-qabê heqanê hometî gam bierzo. E ke jew kesî, ya zî jû dewletî waşt çiyê bikerose, o wext zey beyankerdişê niyetê rind gerek tayn gaman bierzo. La gamê ke AKP, polisanê ci, sermiyananê ci erzenê omidê werdî zî wertera hewadenê. Ney zî zey ‘çarekerdinê meseleyê Kurd’ damisneno. Endî bawereyê hometî ebi hikûmet nêmendo. Çi ke homet-civak no senaryoyî rind silasneno, çend finî temaşe kerdo. Nay ra endî maskeyê AKP kewto. Endî nêşeno xo binimno, kesî bixapîno.
La şarê Kurd û hereketê serbestî bêçare niyo. E ke hikûmet wextê kilm de goreyê waştenan gaman nêerzose şarê Kurd do çarekerdişê xo bivistro dewre. Rayver Öcalan’î hikûmet îqaz kerd û va no şansê peynîyo; e ke AKP seba çarekerdinê meseleya Kurd gam nêerzose Tirkiye û Vakûrê Kurdistan de zî sîstemê kantonê xoser do destpa bikero. Seba nay zî şarê Kurd herb-lejê pawitişê cewherî ra hadre yo. Îmtihanê sifte yê AKP Kobanê yo. Zey ke Rayver Apo’yî va; raştiyê Kobanê kilîtê çarekerdişê pêrokîn meseleyano.