Kurdistanijan ra Emîn Demîrel’î da zonayen ke, Tirkiye de haştî encex bi serbestiya Ocalan’î mimkun a. Demîrel’î aşkere kerd ke, kilîtê haştî Ocalan o, eke kilît bişikîyo, akerdişê kêber mimkûn niyo. Welatijan ra Şukru Bakir’î zî da zonayen ke, Rojhelatê Miyanî de ameyişê haştî encex bi serbestiya Ocalan’î mimkun o. Bakir’î aşkere kerd ke, fikir û hewldayenê ke Ocalan’î heta nika ramitî raya haşitî akerdî.
Mîmarê haştî Ocalan o
Ceniya bi nameyê Salîha Akdogan’î zî vist vîrî ke, komployo ke vera Rayverê Şarê Kurd Abdullah Ocalan’î viraziya teslîm girotişê Kurdan kerd hedef. Akdogan aşkere kerd ke, komplo nika Cizîr û Sûr de rameno û vist vîrî ke nê êrişî nêşkenê netîce bigîrê. Akdogan qiseyê xo winî dewam kerd: “Cuwyayişê bê Ocalan, bê maneyo, bê Ocalan haştî mimkun niyo. Çarekerdin encex bi serbestiya Ocalan’î beno.
AKP bi gonî cewab danê haştî
Welatijan ra Reşît Kûtlû zî hayr ant tekoşîn û hewldayenê Rayverê Şarê Kurd Abdullah Ocalan’î ser û vist vîrî ke Kurdî serbestiya xo deyndarê Ocalan’î yê. Kûtlû da zonayen ke, Reîscûmhûrê Tirkiye Erdogan û hikûmeta AKP bi gonî cewab danê hewldayenanê haştî yê Ocalan’î.
Kûtlû va, rexmê nay, ganî şarê ke Tirkiye de cuwyenê bivînê ke tenya jew mîmarê haştî esto, o zî Ocalan o. Reşît Kûtlû diyar kerd ke 17 serriyo vera Ocalan’î tecrît yeno ramiten û aşkere kerd ke eke no welatî de haştî wazenê, gune desinde îradeyê şarê Kurd Ocalan’î serbest viradê.
DÎHA/ÎZMÎR
Çewlig Erdogan protesto kerd
Vera wehşeto ke dewleta Tirk Cizîr de ramena, jû nêrazîbiyen zî Çewlig ra amê. Çewlig de ser vengdayişê rêxistinanê HDP û DBP yê Sûk, şêlig ver bana HDP de are bî û heta cadeyê Dortyol bi sloganan rayşî. Hemserokê DBP yê Çewlig Feyzûllah Seyhanoglû vist vîrî ke welat de 30 serriyo herm rameno. Seyhanoglû da zonayen ke, qetlîamî açarniyay îmhayê topyekun.
Seyhanoglû wehşetê Cizîr û vatişê Erdogan’î yê ‘ma kotî ra bizanê sivîl ê?’ rê nêrazîbiyen damusna. Seyhanoglû persa ‘kiştişê sivîlan kamcî wijdanî de, kancî merdimatî de esto?’ kerd û ina veng da hikûmet û Erdogan’î: Eke însanê ke Cizîr de amey qetilkerdiş se, şima bizanê ke cayanê ciya yê dinya de pêrokîn dîktatorê ke qetlîamê hinayîn viraştî amey cezakerdin. No serva Milosevîç zî, serva Seddam zî ina bi.Seyhanoglû waşt ke kiştoxê sivîlan aşkere bibê û biyayişî roşnî bibê. Seyhanoglû ard ziwan ke endî civak herbî rê, merdişan rê biyo mird û waşt ke herb hinî vindero.
DÎHA/ÇEWLIG