Şengal bajarode qickek o, başûrê koyê Şengalî de nayîyo ro. Tawo ke mordem şono Çilmêra uca ra rind asayeno bajarê Şengalî. Şengal û dewê Şengalî dormeyê koyê Şengalî de nayîyê ro. Her çiqas ke tayê dewî gelîya Şengalî de nayîyîbî ro kî zaferîyê înan deşte de nayîyê ro. Cayo ke ci ra vanê Serdeşt peyê terteleyî bîyo cayê ronîşteya. Serdêşt newalade derg a. Xorî nîya. Zaf hîra kî nîya. La qasê ke Şengalijanê xo bigêro virana xo comerd a. Nika yanê peyê terteleyî sereyêk heta sereyê bîn şên a. Hûrdmîn hetê Serdeşt koyê. Birode seyrek koyê Şengalî xemilneno. Goreyê vateyanê Şengalijan verê birr zaf sixlet bîyo. Seba siyasetê Saddamî û dewleta Iraqî şar nêçar mendo ke birrî ra daran bibirno. Şarî seba tavîştene darî birnayê. Aye ra kî nika birr zaf bîyo seyrek. Darê Koyê Şengalî berû û simzêr ê. Simzê zerd û qickek î. Tama înan zaf weş a. Domananê selxwanan rê dayo piro. Ê mirdiya xo simza wenê.
Bajarê Şengalî nika xirabe yo. Mendeyê cengê qefçilî yê daîşî yo. zîyaderîyê xo veng o. Şênîyê Şengalî zaf şenik ê. Zîyaderî meymandarîya hêzanê askerî keno. Çeperanê ver de şerwanê HPG, YJA Star û YBŞ û YJŞ estê. Çeperanê pey de kî peşmergeyî estê. Yê pêşmergeyan tam gonî weriya. PDK ye seba ke Şengalî dagir bikero çi dest ra ameyo kerdo. Pêşmergeyî şermokin ê. Sereyê înan verê înan de yo. Tawo ke gerîllayan vînenê zîyaderî sereyê xo kenê çewt. Senî ke wazenê vajêrê; çimê debariyê birijîyo. Eke derdê debariyê mebîyênê ma no şerm ardênê sereyê xo ser. Ma nîya xo kerdênê kepaze. Ma nîya xo şermazar kerdênê. Ma nîya çimê Şengalijan de xo kerdênê xayîn. Ma xo kerdenê remayox.
Şengalijî cuya xo bi kedode girs ramnenê. Koyê Şengalî virana xo înan rê kerda ya, ê guretê virana xo la qanunê Koyê Şengalî kî estê. Yê ey kî goreyê xo qanûnê xo estê. Bi ey ra cûyayîş hêsan nîyo. Ey de cûyayîş hêsan nîyo. Zaf ked wazeno.
Awê ey miçîqîyê. Goreyê ke Şengalijî qale kenê vanê verê hînîyê Şengalî zaf bîyê. Saddamî seba ke şar mêro koyê Şengalî fekê hîneyan gureto. Aye ra kî nika Şengal de hînêyî nemendê. Teberê di hîrê hîneyan ra hînêyî çîn ê.
Nika payîz o. Koyê Şengalî kî goreyê payîzî zerd o. Têlîyê Koyê Şengalî kî zaf ê. Mordem nêşkîno têlîyan ra linge bierzo. Şengalijî koyê Şengalî de pes kenê weyî. Domanî şonê verê mal û selxî. Nika ê pawayê rojanê weşan ê. Pawayê vîyartîşê nê cengê qefçilî yê. Nika cad kenê ke cuya xo newe de awan bikerê. Eke timsahî biverdê Şengalijî xo newe de rêxistin bikerê. Reyna dest bi cuyayîşî bikerê. Dest bi cuyayîşê goreyê kulturê xo bikerê. Newede xo bikerê komelode kulturî û azad bicuyê.