Avdel yewîn xorto ke Şengal de bi mi ra ser Şengalî, ser halê Şengalî qisey keno. Avdel mamoste yo. Malbata xo -ez pey cû pêhesîya- başûr der a. O nêşîyo başur. Ey kî xo dayo koyê Şengalî, kewto virana Şengalî mamostatîye keno. Tawo ke ma gerê xo yê naskerdîşê Şengalî qedêna û ma reştîme verê holika ke ez do tê de bimanî, uca serê kursî de ronîşte bî. Senî ke ez dîya wuşt ra. Ma destê yewbîn toke kerd, bipeşmerîyayîşî mi ra va:
-Ti bi xeyr ameya heval.
Ruyode rindek û merheba dayişode zaf germin, zerrîya mi bena germ. Mi kî bi eynî germîyê cewab da ci:
-Xeyr mîyan de bîme heval.
Ma demêk hal û hewalê yewbîn pers kerd. Ge-ge sohbetê ma bibirîyo kî no birîyayîş derg nêbeno. Ya o ya kî ez vateyî gêna. Ez zîyaderî persan perskena. Wazena Şengalî nasbikerî. Wazena Şengalî fekê Şengalijan ra nasbikerî. Avdel kilmayî rewşa Şengalî bi mi dano nasnayene.
-Bi serra hukmatê Iraqî goreyê meslehatê xo nêzdîyê Şengalî bî. Seba Şengalî çîyê nêkerd. Tenê Şengal kar ard. Xo rê sey askerî us bi kar ard. Seba ke sîyasetê dewleta Iraqî, bi serra milêt nêşkîyênê seba vêşnayîşî gaz, mazot biherêno. Aye ra kî miletî darê Şengalî birnayî berdî vêşnayî. Nika Şengal de bir nêmendo. Cayo ke dar tê de mebo vartîş kî nêbeno. Nika Şengal de vartîş kêm bîyo. Pey hukumetê Iraqî ra partîye amayê-qala PDK yê keno- aye kî çîyê nêkerd seba Şarê Şengalî. Ayê kî seba meslehatê xo kerd. Mileto belengaz hînî bî belengaz. Tenê camêrdê xo viraştî, da înan. Miletê feqîrî tu xêra aye nêdî.
Nika kî heval amayê. Ma nîyadêrîme hevalî seba Şengalî çi bikerê. Heta nika rind ê. Vanê şarê Şengalî bi xo xo rê bikero. No fikrode rind o.
Mi çîyê nêvat. Ma tayê bêveng mendîme peyê cû Avdel wuşt ra verê xo da cêr û şî. Avdelî kilm la zaf bi zerrî ra halê Şengalî û Êzdîyan bi mi da nasnayene. Tenê nêda nasnayene da hîskerdene.