Bextwaştoxê ke şerî ver remayî û Edene de bica bîyî, şert û mercê zehmetinan de cuyenî. Bextwaştoxî ya çadiran de manenî yan zî keyeyê kîrayinan de manenî. Keyeyê ke bextwaştoxê tede manenî, rutubetin î û benî sebebê nêweşîyanê cîya-cîyayan. Wexto ke germayîya bajarî zî ser de zêde beno, karê bextwaştoxan hîna zehmetin beno. Wexto ke bextwaştoxî ameyî Edene, kîrayê keyeyan erjan bîy, labelê dima ra vaye bîyî. Babete ser o bextwaştoxan ra Yahya Hendevîyî va ‘merdim nêşeno keyeyan de bimano’ û wina domna: “Tirkîya de cuyayîş zehmet o. Ma nêşenî keye bivînî, çimkî keyeyî zaf vaye yî. Ma aşmêk de 700 TL kîra danî.”Bextwaştoxan ra Kemal Omer Şerîfî zî wina va: “Wayîrê keyeyî kamcîn wext biwazo, eşkeno ma bivejo. Ma çend keyeyî pîya manenî. Seba ke rewşa keyeyan baş nîya, ma nêweş kewenî. Merdimî ma ser ro pere qezenç kenî û cîyakarî kenî.”
DÎHABER/EDENE