Dayikê Şeme ke no 21 serrîyo bê ke hamnan û zimistan, germ û serd biewnê pey edaletî de yê. Dayikan bi no hefte ra pîya 600 hefte pey xo de ternay. Dayikanê Şeme day zonayen ke eke bêedaletî biramo iyê dê 600 hefteyê bînî zî nûmayişa xo biramnê. 

Dayikê Şeme ke her hefte Meydanê Galatasaray de seba persa mordemanê xo yê vindî yenê têlewe, hefteya 600. ya nûmayişa xo de reyna are bî û persa “Mordemê ma yê vindî kotî de yê” kerdî. Mordemê  vindîyan û bi hezaran dostê ci roja Şeme seatanê sodir ra tepya Meydanê Galatasaray de amey têlewe. Rîwalo ke nûmayişa tarîxî 600 hefte pey xo de terna, no hefte xêlê pankart û nuşteyê taybet amey hadrekerden. Kesê şî nûmayişî zî bi qurnefîl û resîmanê kesê vindî pê hetek de amey têlewe. No hefte xêlê akademîsyen, hunermend, roşnbîr, nuştox, rojnameger û parlamenterê HDP û CHP zî tewrê nûmayişî bî û destegê xo damûsnay. 


36 serrîyo lajê xo geyrena

Nûmayişê hefteya 600. yê Dayikanê Şeme de sifte maya Hayrettîn Eren o ke verîya 36 serran bin çiman de ame vindîkerdiş, Elmas Eren qisey kerd. Dayika Elmas ke no 36 serrîyo persa lajê xo kena wina va: “„Çend Hezîranî vêrdî ra. 36 serrîyo lajê mi vindî yo. Geyrayişê esteyanê ey ra ganê mi vejya. Şima se kenê bikerê, ma esteyanê domananê xo wazenê.”

Peycoy sembolanê nûmayişê Dayikê Şeme ra maya Hasan Ocak Emîne Ocak qisey kerd. Emîne Ocak aşkere kerd ke no 21 serrîyo ke a Meydanê Galatasaray de ronişena û va, ‘seba gencan, dayikan û pîyan  roniştîya. Seba ke mayî hindî nêbermê, domanî sêwî nêmanê ez tîya de roniştîya.


Lazim bikero 600 hefteyê bînî 

Dadîya Murat Yildiz o ke verîya 21 serran Îzmîr de  qereqol de ame vindîkerdiş, Hanîfe Yildiz zî nûmayiş de hîssanê xo ard ziwan û diyar kerd ke eke bêedaletî biramo, iyê dê 600 hefteyê bînî zî nûmayişa xo biramnê û dadîya Berfo vist vîrî. Yildiz va, wexto ke ma tîya de roniştî mavêna ma ra Dadîyê Berfo şî. Înan tîya ra selamî kenime. 

Nûmayişî de herzewbîn keynaya Fehmî Tosun Besna Tosun zî qisey kerd. Tosun vist vîrî ke dûştê înan sûcê tewr giran yê mordemî ameyo kerdiş û wina va: “Verîya 

21 serran ma û pîyê ma no meydanî de destpa tekoşînî kerdî. Nika zî ma nefşê newî, domanê înan tekoşîna înan ramnenê. Tosûn aşkere kerd ke geyrayişê sîya (kemer) mezelî yê domanan şermê jew welatîyo.


‘Yê ke ganî bitersê ma nîyê…’

Besna Tosun vist vîrî ke mesûlê 21 serrî no meydanî de bîyayiş tenya dewlet nîya û wina va: “Ma zî nayî ra mesûl ê. Eke ma bi se hezaran leyê mayan de bîyaybî ewrê nê çî dê nêciwîyaybîya. 90î zî wina nêbî. Yê ke ganî bitersê ma nîyê. Yê ke ganî bitersê yê ke bi tanq û topan sûkan çarnay hebare yê. Yê ke ganî bitersê yê ke dayika Taybet bi rojan kuçe de ternayî yê, yê ke pitika ke nêama dinya pîzeyê maya xo de qetil kerdîyî yê. Yê ke ganî bitersê yê ke ma mehkûmê no meydanî kerdî yê. Ma no tersî, na bêvengî qebûl nêkenê. Ma dê na tekoşîn biramê, la bi ters, bi bêvengî nê. 

Torna vindî Abdulkerîm Yurtsevenî Berîvan Yurtseven zî persa ‘xeynê kurdbîyen ra vêşêr sûcê kalikê mi estbi? kerd û da zonayen ke heta ke hesab bîro dayen iyê dê tekoşîna xo biramnê. 

Badê qiseyanê mordemanê vindîyan, mesaja Mayanê Plaza de Mayo yê Arjantînî amê wendiş. Ser nameyê pêrokîn nûmayişkaran damûstayîna pîyayî Serpîl Taşkaya ke pîyê ci Huseyîn Taşkaya Sêwereg de ame vindîkerdiş wanîya. Taşkaya destnîşan kerd ke rixmo ke  600 hefte yo no meydanî de yê zî kiştoxî nêamey peydakerdiş û waştena mordemê vindîyan ard ser ziwan. Badê nûmayişî mordemê vindîyan meydanî bi bêvengî terk kerdî. 


Welat û Awrûpa ra desteg

Merdimê vindîyan yê ke pey aqibetê mordemanê xo de yê Amed, Elîh, Enqera û Îzmîr de zî geyrayişa xo ya edaletî ramitî. Merdimanê vindîyan nûmayişa Mayanê Şeme ke 600 hefte pey xo de ternay zî selamî kerdî. 

Seba nûmayişa Mayanê Şeme jew desteg zî teberê welatî ra ame. Bi seyan kesê ke Meydanê Medborgarplatsen yê Swêd, Meydanê Chatlet Le Halles yê Parîs, Meydanê Place Kléber yê Strasbûrg, kuçeyê Graben yê Vîyana,  Meydanê Willy Brandt Platz yê Aachen û Londra de amey pêhet nûmayişê runiştişê bêvengî viraştî û nûmayişê Mayanê Şemî yê Meydanê Galatasaray selamî kerdî.  


DÎHA / STENBOL